80 - He Frowned - `Abasa

Ó fajú ro, ó sì pẹ̀yìndà1

nítorí pé afọ́jú wá bá a.

Kí sì l’ó máa fi mọ̀ ọ́ pé ó ṣeé ṣe kí ó ṣàfọ̀mọ́ (ara rẹ̀ kúrò nínú àìgbàgbọ́)

tàbí kí ó gbọ́ ìrántí, kí ìrántí náà sì ṣe é ní àǹfààní?

Ní ti ẹni tí ó ka ara rẹ̀ kún ọlọ́rọ̀,

òun ni ìwọ tẹ́tí sí.

Kò sì sí ẹ̀ṣẹ̀ fún ọ bí kò bá ṣe àfọ̀mọ́ (ara rẹ̀ kúrò nínú àìgbàgbọ́).

Ní ti ẹni tí ó sì wá bá ọ, tó ń yára gágá (sí ìrántí, ìyẹn afọ́jú),

tí ó sì ń páyà (Allāhu),

:10

ìwọ kò sì kọbi ara sí i.

:11

Rárá (kò tọ́ bẹ́ẹ̀). Dájúdájú al-Ƙur’ān ni ìrántí.

:12

Nítorí náà, ẹni tí ó bá fẹ́ kí ó rántí rẹ̀.

:13

(Al-Ƙur’ān) wà nínú àwọn tàkádà alápọ̀n-ọ́nlé,

:14

A gbé e ga, A sì ṣe é ní mímọ́

:15

ní ọwọ́ àwọn òǹkọtíà (ìyẹn, àwọn mọlāika),

:16

àwọn alápọ̀n-ọ́nlé, àwọn ẹni rere.

:17

Wọ́n ti fi ènìyàn gégùn-ún (nípa) bí ó ṣe jẹ́ aláìmoore jùlọ!

:18

Kí sì ni Allāhu fi ṣẹ̀dá rẹ̀?

:19

Nínú àtọ̀ l’Ó ti ṣẹ̀dá rẹ̀. Ó sì pèbùbù (ẹ̀yà-ara) rẹ̀.

:20

Lẹ́yìn náà, Ó ṣe ọ̀nà àtiwáyé ní ìrọ̀rùn fún un.

:21

Lẹ́yìn náà, Ó máa pa á. Ó sì máa fi sínú sàréè.

:22

Lẹ́yìn náà, nígbà tí Allāhu bá fẹ́, Ó máa gbé e dìde.

:23

Rárá o! Ènìyàn kò tí ì ṣe n̄ǹkan tí Allāhu pa láṣẹ fún un.

:24

Nítorí náà, kí ènìyàn wòye sí oúnjẹ rẹ̀.

:25

Dájúdájú Àwa ń rọ òjò ní púpọ̀.

:26

Lẹ́yìn náà, A mú ilẹ̀ sán kànkàn.

:27

A sì mú kóró èso hù jáde láti inú rẹ̀;

:28

àti èso àjàrà àti kànnáfùrù,

:29

àti igi òróró Zaetūn àti dàbínù,

:30

àti àwọn ọgbà tó kún fún igi,

:31

àti àwọn èso (mìíràn) pẹ̀lú ewé tí ẹranko ń jẹ, (A mú wọn hù jáde).

:32

(Wọ́n jẹ́ n̄ǹkan) ìgbádùn fún ẹ̀yin àti àwọn ẹran-ọ̀sìn yín.

:33

Nígbà tí fífọn sínú ìwo nígbà kejì bá ṣẹlẹ̀,

:34

ní ọjọ́ tí ènìyàn yóò sá fún arákùnrin rẹ̀,

:35

àti ìyá rẹ̀ àti bàbá rẹ̀,

:36

àti ìyàwó rẹ̀ àti àwọn ọmọ rẹ̀.

:37

Ẹnì kọ̀ọ̀kan wọn ní ọjọ́ yẹn l’ó ti ní ọ̀ràn tó máa tó o ó rán.

:38

Àwọn ojú kan lọ́jọ́ yẹn yóò mọ́lẹ̀.

:39

Wọn yó máa rẹ́rìn-ín, wọn yó sì máa dunnú.

:40

Àwọn ojú kan lọ́jọ́ yẹn ni eruku yó sì bò mọ́lẹ̀.

:41

Òkùnkùn yó sì bò wọ́n mọ́lẹ̀.

:42

Àwọn wọ̀nyẹn gan-an ni aláìgbàgbọ́, ẹlẹ́ṣẹ̀.