80 - He Frowned - `Abasa

ده تندى تریو كړ او مخ يې وګرځاوه

په دې وجه چې ده ته ړوند راغى

او ته څه شي پوه كړى يې، ښايي چې دى پاك شي

یا به دى نصیحت (او پند) واخلي، نو ده ته به پند نفع ورسوي

هر چې هغه څوك دى چې استغنا يې كړې ده

نو ته په هغه پسې كېږې

حال دا چې په تا هېڅ الزام نشته چې هغه پاك نشي

او هر چې هغه څوك دى چې تا ته په منډو راځي

په داسې حال كې چې دى (له الله نه) وېرېږي

نو ته له هغه نه مشغولېږې

داسې كله هم مه كوه، بېشكه دا (سورت) یو پند (او نصیحت) دى

نو هغه څوك چې غواړي (نو) دى دې ومني

(دغه) په عزتمنو پاڼو كې دى

چې پورته كړى شوې، ښې پاكې كړى شوې دي

د لیكونكو (ملايكو) په لاسونو كې

چې ډېر عزتمن، ډېر نېك دي

انسان دې هلاك كړى شي، دى څومره ډېر ناشكره دى!

دى دغه (الله) له څه شي نه پیدا كړى دى؟

له نطفې نه، دى يې پیدا كړى دى، پس دى يې اندازه كړى دى

بیا يې ده ته لاره ور اسانه كړې ده

بیا يې دى مړ كړ، نو دى يې په قبر كې كېښود

بیا چې كله وغواړي دى به ژوندى كړي

داسې نه ده، دغه (انسان) هغه كار نه دى كړى چې دغه (الله) ده ته حكم كړى دى

نو انسان دې خپل طعام ته وګوري

چې بېشكه مونږ اوبه راتوى كړې دي، راتویول

بیا مونږ ځمكه څیرې كړې ده، څیرول

نو مونږ په دې كې دانې را زرغونه كړي دي

او انګور او تركاريانې

او زیتون او كجورې

او ګڼ باغونه

او مېوې او ګياه (واښه)

ستاسو او ستاسو د څارویو د فايدې لپاره

نو كله چې سخت اواز راشي

په هغه ورځ چې سړى به له خپل وروره تښتي

او له خپلې مور او خپل پلاره

او له خپلې ښځې او خپلو زامنو نه

په دوى كې د هر سړي لپاره به په دغه ورځ كې یو حال وي چې دى به (له نورو نه) بې پروا (بې غوره) كوي

څه مخونه به په دغې ورځ كې روښانه وي

خندېدونكي (او) خوشاله به وي

او څه مخونه به په دغې ورځ كې پر هغو به ګرد پروت وي

دغه (مخونه) به توروالي پټ كړي وي

دغه (تور مخي) خلق هم دوى كافران (او) فاجران (بدكاران) دي