75 - The Resurrection - Al-Qiyāmah

Èmi (Allāhu) ń fi Ọjọ́ Àjíǹde búra.

Mo tún ń fi ẹ̀mí tó máa dá ara rẹ̀ ní ẹ̀bi búra.

Ṣé ènìyàn lérò pé A kò níí kó àwọn eegun rẹ̀ jọ ni?

Bẹ́ẹ̀ ni A sì lágbára láti to eegun ọmọníka rẹ̀ dọ́gba

Rárá ènìyàn fẹ́ máa ṣe aburú lọ bẹ́ẹ̀ nínú ìṣẹ̀mí ayé rẹ̀

ni ó fi ń bèèrè pé: “Ìgbà wo ni Ọjọ́ Àjíǹde?”

Nígbà tí ojú bá rí ìdààmú tó sì yà sílẹ̀ tí kò lè padé,

àti (nígbà) tí òṣùpá bá wọ̀ọ̀kùn,

àti (nígbà) tí wọ́n bá pa òòrùn àti òṣùpá pọ̀ mọ́ra wọn tí ìmọ́lẹ̀ méjèèjì pòóró,

:10

ènìyàn yóò wí ní ọjọ́ yẹn pé: “Níbo ni ibùsásí wà?”

:11

Rárá, kò sí ibùsásí.

:12

Ọ̀dọ̀ Olúwa rẹ ni ibùdúró ní ọjọ́ yẹn.

:13

Wọ́n máa fún ènìyàn ní ìró ní ọjọ́ yẹn nípa ohun tó tì síwájú (nínú iṣẹ́ rẹ̀) àti ohun tó fi kẹ́yìn (nínú orípa iṣẹ́ rẹ̀).

:14

Ṣebí ènìyàn dá ara rẹ̀ mọ̀,

:15

ìbáà mú àwọn àwáwí rẹ̀ wá.

:16

Má ṣe gbé ahọ́n rẹ sí ìmísí láti kánjú ké e.

:17

Dájúdájú Àwa l’A máa ṣe àkójọ rẹ̀ (sínú ọkàn rẹ) àti kíké rẹ̀.

:18

Nígbà tí A bá ń ké e (fún ọ), kí o sì máa tẹ̀lé kíké rẹ̀.

:19

Lẹ́yìn náà, dájúdájú Àwa l’A máa ṣe àlàyé rẹ̀ fún ọ.

:20

Kò rí bẹ́ẹ̀, bí kò ṣe pé, ẹ nífẹ̀ẹ́ ayé ni.

:21

Ẹ sì ń gbé ọ̀run jù sílẹ̀.

:22

Àwọn ojú kan ní ọjọ́ yẹn yóò tutù (fún ìdùnnú).

:23

Olúwa wọn ni wọn yóò máa wò.

:24

Àwọn ojú kan ní ọjọ́ yẹn sì máa bàjẹ́.

:25

(Ojú náà) yóò mọ̀ dájú pé wọ́n máa fi aburú kan òhun.

:26

Kò rí bẹ́ẹ̀, nígbà tí ẹ̀mí bá dé gògòńgò.

:27

A sì máa sọ pé: “Ǹjẹ́ olùpọfọ̀ kan wà bí (tí ó máa pọfọ̀ láti gbà á sílẹ̀ lọ́wọ́ ikú)?

:28

Ó sì máa dá a lójú pé dájúdájú ìpínyà ayé ti dé.

:29

Ojúgun yó sì lọ́mọ́ ojúgun.

:30

Ọ̀dọ̀ Olúwa rẹ sì ni wíwa ẹ̀dá lọ ní ọjọ́ yẹn.

:31

Kò kúkú gba òdodo gbọ́, kò sì kírun.

:32

Ṣùgbọ́n ó pe òdodo ní irọ́. Ó sì kẹ̀yìn sí i.

:33

Lẹ́yìn náà, ó lọ sí ọ̀dọ̀ àwọn ènìyàn rẹ̀, ó sì ń ṣe fáàrí.

:34

Ègbé ni fún ọ, ègbé ni sẹ́.

:35

Lẹ́yìn náà, ègbé ni fún ọ, ègbé sì ni fún ọ sẹ́.

:36

Ṣé ènìyàn lérò pé A máa fi òun sílẹ̀ lásán ni?

:37

Ṣé kò ti jẹ́ àtọ̀ mọnī tí wọ́n dà jáde sínú àpòlùkẹ́ ni?

:38

Lẹ́yìn náà, ó di ẹ̀jẹ̀ dídì. (Allāhu) sì ṣẹ̀dá (rẹ̀). Ó sì ṣe é tó dọ́gba jálẹ̀ léèyàn.

:39

(Allāhu) sì ṣe ìran méjì jáde láti ara rẹ̀, akọ àti abo.

:40

Ǹjẹ́ Ẹni tí Ó ṣe ìyẹn kò níí ní agbára láti jí àwọn òkú dìde bí?