74 - The Cloaked One - Al-Muddaththir

Ìwọ olùdaṣọbora.

Dìde kí o ṣèkìlọ̀.

Olúwa rẹ sì ni kí o gbé títóbi fún.

Aṣọ rẹ ni kí o fọ̀ mọ́.

Òrìṣà ni kí o jìnnà sí.

Má ṣe tọrẹ nítorí kí o lè rí púpọ̀ gbà.

Olúwa rẹ ni kí o ṣe sùúrù fún.

Nígbà tí wọ́n bá fọn fèrè oníwo fún àjíǹde,

ìyẹn, ní ọjọ́ yẹn, ni ọjọ́ ìnira,

:10

tí kò níí rọrùn fún àwọn aláìgbàgbọ́.

:11

Fi Mí dá ẹni tí Mo dá ní òun nìkan (ìyẹn nínú ikùn ìyá rẹ̀).

:12

Mo sì fún un ní ọ̀pọ̀lọ́pọ̀ dúkìá

:13

àti àwọn ọmọkúnrin tó ń bẹ pẹ̀lú rẹ̀.

:14

Mo sì fi àyè ìrọ̀rùn gbá a dáadáa.

:15

Lẹ́yìn náà, ó tún ń jẹ̀rankàn pé kí N̄g ṣe àlékún.

:16

Rárá o! Dájúdájú ó jẹ́ alátakò sí àwọn āyah Wa.

:17

Èmi yóò la ìyà pọ́nkèpọ́nkè bọ̀ ọ́ lọ́rùn (nínú Iná)

:18

Dájúdájú ó ronú (lódì nípa al-Ƙur’ān). Ó sì pinnu (ọ̀rọ̀ kan nínú ẹ̀mí rẹ̀).

:19

Wọ́n sì ṣẹ́bi lé e nípa bí ó ṣe pinnu.

:20

Lẹ́yìn náà, Wọ́n tún ṣẹ́bi lé e nípa bí ó ṣe pinnu.

:21

Lẹ́yìn náà, ó wò sùn.

:22

Lẹ́yìn náà, ó fajú ro, ó sì dijú mágbárí.

:23

Lẹ́yìn náà, ó pẹ̀yìndà, ó sì ṣègbéraga.

:24

Ó sì wí pé: “Kí ni èyí bí kò ṣe idán àtọwọ́dọ́wọ́.

:25

Kí ni èyí bí kò ṣe ọ̀rọ̀ abara”

:26

Èmi yóò fi sínú iná Saƙọr.

:27

Kí l’ó mú ọ mọ ohun tó ń jẹ́ iná Saƙọr?

:28

(Saƙọr) kò níí ṣẹ́ ẹ kù, kò sì níí pa á tì.1

:29

Ó máa jó awọ ara di dúdú.

:30

(Àwọn mọlāika) mọ́kàndínlógún ni ẹ̀ṣọ́ rẹ̀.

:31

Àwa kò ṣe ẹnì kan ní ẹ̀ṣọ́ Iná àfi àwọn mọlāika. Àwa kò sì ṣe òǹkà wọn (bẹ́ẹ̀) bí kò ṣe (nítorí kí ó lè jẹ́) àdánwò fún àwọn tó ṣàì gbàgbọ́, àti nítorí kí àwọn tí A fún ní Tírà lè ní àmọ̀dájú àti nítorí kí àwọn tí wọ́n gbàgbọ́ ní òdodo lè lékún ní ìgbàgbọ́ òdodo. (Ó rí bẹ́ẹ̀) nítorí kí àwọn tí A fún ní Tírà àti àwọn onígbàgbọ́ òdodo má baà ṣeyèméjì àti nítorí kí àwọn tí àrùn wà nínú ọkàn wọn àti àwọn aláìgbàgbọ́ lè wí pé: “Kí ni Allāhu gbà lérò pẹ̀lú àpèjúwe yìí?” Báyẹn ni Allāhu ṣe ń ṣi ẹni tí Ó bá fẹ́ lọ́nà, Ó sì ń tọ́ ẹni tí Ó bá fẹ́ sọ́nà. Kò sì sí ẹni tí ó mọ àwọn ọmọ ogun Olúwa rẹ àfi Òun náà. (Iná Saƙọr) kò sì jẹ́ kiní kan bí kò ṣe ìrántí fún abara.

:32

Ẹ gbọ́! Allāhu fi òṣùpá búra.

:33

Ó tún fi alẹ́ nígbà tí ó bá lọ búra.

:34

Ó tún fi òwúrọ̀ nígbà tí ojúmọ́ bá mọ́ búra.

:35

Dájúdájú (iná Saƙọr) ni ọ̀kan nínú (àwọn àdánwò) tó tóbi.

:36

(Ó jẹ́) ìkìlọ̀ fún abara.

:37

Fún ẹni tí ó bá fẹ́ nínú yín láti tẹ̀ síwájú tàbí láti fà sẹ́yìn (nínú ẹ̀ṣẹ̀).

:38

Ẹ̀mí kọ̀ọ̀kan ni onídùúró fún ohun tó ṣe níṣẹ́.

:39

Àyàfi àwọn èrò ọwọ́ ọ̀tún.

:40

Wọn yóò máa bira wọn léèrè ọ̀rọ̀ nínú àwọn Ọgbà Ìdẹ̀ra

:41

nípa àwọn ẹlẹ́ṣẹ̀ pé:

:42

“Kí ni ó mu yín wọ inú iná Saƙọr?”

:43

Wọn yóò wí pé: “Àwa kò sí nínú àwọn olùkírun ni.

:44

Àwa kò sì sí nínú àwọn tó ń bọ́ àwọn mẹ̀kúnnù.

:45

Àwa sì máa ń sọ ìsọkúsọ pẹ̀lú àwọn onísọkúsọ.

:46

Àti pé àwa máa ń pe Ọjọ́ ẹ̀san ní irọ́

:47

títí ikú fi dé bá wa.”

:48

Ìpẹ̀ àwọn olùṣìpẹ̀ kò sì níí ṣe wọ́n ní àǹfààní.

:49

Kí ló mú wọn ná tí wọ́n ń gbúnrí kúrò níbi ìrántí

:50

bí ẹni pé àwọn ni kẹ́tẹ́kẹ́tẹ́ tó ń sá lọ,

:51

tó sá fún kìnìhún?

:52

Rárá, ńṣe ni ẹnì kọ̀ọ̀kan nínú wọn ń fẹ́ kí Á fún òun náà ní Tírà tí ó máa ṣeé tẹ́ han àwọn ènìyàn (bíi ti al-Ƙur’ān).

:53

Rárá. Wọn kò páyà ọ̀run ni.

:54

Ẹ gbọ́! Dájúdájú al-Ƙur’ān ni ìrántí.

:55

Nítorí náà, ẹni tí ó bá fẹ́ kó rántí rẹ̀.

:56

Wọn kò sì níí rántí (al-Ƙur’ān) àfi tí Allāhu bá fẹ́. (Allāhu) Òun l’a gbọ́dọ̀ bẹ̀rù. Òun l’ó sì ni àforíjìn.