Шаьш нуьцкъала /керстанийн синош/ схьадохучу /маликех/ дуй боу Ас,

Шаьш жигара/муъмин нехан синош/ схьаоьцучу /маликех/ дуй боу Ас,

Нека дечарах, нека дарца а, дуй боу Ас,

Сихлуш долчарах, сихдаларца, дуй боу Ас,

/Делан/ омра шен-шен метта дIадоькъучарах /маликех/ а дуй боу Ас:

Оцу дийнахь /Iалам/ эгор ду эгочо.

Цунна тIаьххьо хир ду тIаьхьадогIург.

Дегнаш оцу дийнахь /кхераделла/ детталур ду.

Церан хьежар /шайн ирча хьал гучудаьлча, сийсазадаьлла/ охьатаь1на хир ду.

Олура цара /дуьненахь болуш, ца бешаш/: "Вай юхадерзор ду вай схьадаьллачу /дахаре/

Вайх хиллачул тIаьхьа яхкаелла даьIахкаш?"

Олура цара: "Иза хIета пайдабоцу юхадерзар ма ду".

Баккъалла а, иза беккъа цхьа мохь хир бу. (Исрафил малико сур лакхар.)

Уьш берриге а /денбина/ латта тIехь хир бу.

Хьоьга деъний /хIай Мухьаммад/ Мусан хабар?

Цуьнга кхайкхира иза Кхиош-кхобучо ТIува цIе йолчу езачу атагIахь:

"Хьада ФирIавна тIе гIо‚ иза тIехваьлла /Делан дозанех/.

Ахь āла /цуьнга/: "Хьо /ширках/ цIанвала дагахь вуй?

Ас нисвийр ву хьо Кхиош-кхобучунна тIе‚ тIаккха кхоьрур ву хьо". ("Хир ву хьо дика Iамал ечарах.")

Цо (Мусас) гайтира цуьнга доккха делил (муIжизат‚ бозбуунчалла).

Харцдира /иза ФирIавнас/‚ Iеса велира иза.

ТIаккха юхавелира, сихвелла.

Цо гулбира /бозбуунчаш а‚ шен бIо а/‚ кхайкхира‚

Т1аккха цо элира: "Со ву вуно лекха волу шу кхиош-кхобуш волу /шун дела/!"

Дала схьалецира иза тIаьххьара /дош бахьанехь/ таIзарций‚ хьалха аьлла /дошбахьанехь/ таIзарций.

Баккъалла а, цу чохь хьехам ма бу /Делах/ кхоьруш волчунна.

Шу дара хала /Цунна/ кхолла я стигал яра? Цо х1оттийна иза!

Цо айбира цуьнан тхов‚ тIаккха нисйира /цхьа а гуш 1уьрг доцуш/.

Бодане йира цуьнан буьйса‚ схьадаьккхира сатасар.

Латта цул тIаьхьа даржийра Цо.

Схьадаьккхира цунах хи а‚ дожийлаш а.

Лаьмнаш дуьйг1ира Цо /латта тIехь/.

Шуна а пайда болуш‚ шун бежнашна а.

Боккха бāлабеъча,

Оцу дийнахь адамна дагадогIур ду ша къахьегнарг.

Гучуйоккхур ю жоьжахати гучунна.

Амма тIехваьлларг /Делан дозанех/‚

/Эхартал/дуьненан дахар хаьржинарг −

Жоьжахати хир ю цуьнан чугIойла.

Амма ша Кхиош-кхобучунна хьалха хIотта кхоьруш хилларг‚ шен дезачух (дуьненан марзонах) шен са а духатоьхнарг−

Ялсамани хир ю цуьнан чугIойла.

Хьоьга хоьтту цара /хIай Мухьаммад, ца бешаш/ сахьтах‚ маца хир ду иза хIоттар‚ бохуш‚

Хьуна мичара ду и хьехадан?

Хьо Кхиош-кхобучуьнга ю цуьнан чакхе!

Баккъалла а, хьо кхерамча ву цунах кхоьруш волчунна.

Уьш иза шайна гуш долчу дийнахь хир бу шаьш /дуьненахь/ цхьа суьйре я цхьа Iуьйре бен ца яьккхинарш санна.