77 - The Emissaries - Al-Mursalāt .
ТIеттIа дохуьйтучу мехашца /дуй боу Ас/‚
Нуьцкъала хьоькхучу мехашца /дуй боу Ас/‚
/ДогIа/ даржочу мехашца /дуй боу Ас/‚ /я догIа даийта мархаш лохкучу маликех/,
/Бакъдерг харцдолчух‚ хьаналдерг хьарамдолчух/ къасточу /маликашца/ дуй боу Ас‚
Хьехам /пайхамаршка/ дIалуш долчу /маликашца/ /дуй боу Ас/‚
/Далла наха/ бехк ца биллитарна /шайга элчанаш ца баийтира‚ аьлла/‚ /Делера/ кхерам тасарца а /доуьйту и вехьеш/:
Баккъалла а, шуна ваIда йинарг хилаза ца долу /и къематде дог1ур ду:/
Седарчий дIадайинчухенахь‚
Стигал единчу хенахь‚
Лаьмнаш нисдина дIасадаьржинчу хенахь‚
Элчанаш /гулбан тешалла дан/ хан тоьхначу хенахь.
Муьлхачу денна тIаьхьатаьттина /элчанийн тешалла/?
Къастаманденна!
Стено хаийтина хьоьга /хIай Мухьаммад/‚ хIун ду и къастаман де?
Боккха бāлабу оцу дийнахь /дин/ харцдечарна.
Оха хIаллак ца бина хьалха хилларш?
ТIаккха царна тIаьхьабохуьйтур бу Оха тIаьхьахилларш.
Иштта /та1зар/ до Оха къинош леточарна.
Боккха бāла бу оцу дийнахь /дин/ харцдечарна.
Оха ца кхоьллина шу хIумма йоцчу хих?
Т1аккха Оха дIа ма нисдира иза чIогIачу меттигехь.
Цхьа билгала хан тIекхаччалц.
Оха дIанисдира‚ дика дIанисдийраш а ду /Тхо/.
Боккха бāла бу оцу дийнахь /дин/ харцдечарна.
Оха ца хилийтира латта /шуна/ дIатардала меттиг хила,
Дийна болчарна а‚ беллачарна а?
Оха хилийтира цунна (латтана) тIехь лекха лаьмнаш‚ шуна малора теза хи (хаза чам болу, дег1ана томе долу хи).
Боккха бāла бу оцу дийнахь /дин/ харцдечарна.
/Эр ду маликаша/: "ДIагIо /хIинца/ шаьш ша харцдеш хиллачунна (жоьжахатин Iазапна) тIе!
ДIагIо шен кхо дāкъа долчу IиндагIе!"
IиндагIа а хир дац /цунах/‚ цIерах а ларор дац цо.
Баккъалла а, цо суйнаш кхуьссур ду, гIаланаш санна (даккхий)‚
Шаьш можа эмкалш санна.
Боккха бāла бу оцу дийнахь /дин/ харцдечарна!
Иза де ду − уьш бист хир бац.
Царна пурба лур дац тIаккха цара бехказлонаш ян.
Боккха бāла бу оцу дийнахь /дин/ харцдечарна!
Иза къастаман де ду. Оха гулдийр ду шу а‚ хьалхарнаш а.
Шайна цхьа мекарло хиллехь‚ йе Суна /шайн/ мекарло!
Боккха бāла бу оцу дийнахь /дин/ харцдечарна!
Баккъалла а, /Делах/ кхоьруш берш − уьш хир бу IиндагIехь а‚ шовданашкахь а‚
Шайна безначу стоьмашкахь а.
ГIоза даа‚ гIоза мала шаьш Iамал йина ма хилла!
Оха иштта бекхам бо дикачарна!
Боккха бāла бу оцу дийнахь /дин/ харцдечарна!
Даа‚ кIеззиг пайда эца /дуьненахь/: баккъалла а, шу къинош динарш ду-кх!
Боккха бāла бу оцу дийнахь /дин/ харцдечарна!
Цаьрга элча: "Гора гIо /ламаз де/!" − уьш гора ца гIора.
Боккха бāла бу оцу дийнахь /дин/ харцдечарна!
Муьлхачу дийцарах цул тIаьхьа уьш тешар бу?