71 - Noah - Nūĥ .
Баккъалла а, Оха вахийтира шен къомана тIе Нухь: "Кхерам таса хьан къомана цунна тIе лазош долу Iазап дале"‚ аьлла.
Цо элира: "ХIай сан къам! Баккъалла а, со шуна /ваийтина/ билгала волу кхерамча ву-кх:
Далла Iибадат де‚ Цунах кхера‚ суна муьтIахь хила!
/ТIаккха/ Цо гечдийр ду шуна шун къинош‚ тIаьхьатоттур ду шу /Iазап ца деш/ цхьана тоьхначу ханна − Iожалла т1екхаччалц. Баккъалла а, Делан Iожалла, ша еъча, тIаьхьатоттур яц‚ шу хууш хиллехь".
Цо (Нухьас ша дукха къахьегначул тIаьхьа, наха дин тIе ца лоцуш, гаттавелча) элира: "Со Кхиош-кхобуш волу сан Дела‚ баккъалла а, ас кхайкхийра /дин/ сан къоме буса а‚ дийнахь а.
Амма сан кхайкхамо уьш /динах/ бовдар бен алсам ца даьккхи.
Баккъалла а, ас уьш мел кхайкхи Хьоьга шайна гечдан‚ цара шайн пIелгаш шайн лергий чудуьхкара /сан кхайкхар шайна ца хазийтархьама/‚ шайн бедаршца шайн кортош хьулдора /ца хазийтархьама/‚ уьш чIагIбелира /шайн къиной тIехь/‚ курабевлира курабовларца.
ТIаккха ас цаьрга кхайкхира чIогIа (ца кхоьруш, аз айдина).
ТIаккха, баккъалла а, ас цаьрга кхайкхира гучахь, ас кхайкхира цаьрга къайлаха.
Ас элира: "Гечдар деха шаьш кхиош-кхобуш волчу Деле‚ баккъалла а, Иза хилла дукха гечдийриг.
Цо стигал йоуьйтур юшуна алсам /догIица/.
Цо гIодийр ду шуна хьолаца‚ кIенташца‚ хуьлуьйтур ю шуна бошмаш‚ хуьлуьйтур ду шуна хиш-татолаш.
Шуна хIун хилла? ХIунда дог ца доху аш Деле /Иза/ лийрарца?
Цо кхоьллина шу даржаца (хьалха тIадам‚ тIаккха детина цIи хуьлуш‚ тIаккха − т1ехк (даьIахк) хуьлуш‚ тIаккха цунна тIе жижиг латош…).
Шуна ца го‚ муха кхоьллира Дала тIеттIа ворхI стигал?
Цо хилийтира бутт царна чохь нур хилла‚ Цо хилийтира малх чиркх хилла.
Дала шу схьадалийтира лаьттах орамат /санна кхуьуш/. (Āдам лаьттах кхоьллира).
ТIаккха Цо шу юха дIадерзор ду цуьнга (лаьтте)‚ арадохур ду /лаьтта чуьра/ арадахарца /къематдийнахь/.
Дала хилийтина шуна латта, /дIабаржина/ куз санна.
Шу цунна тIехула лелийтархьама, шайна шуьйра некъаш луьйцуш".
Нухьас элира: "Со кхиош-кхобуш волу сан Дела‚ баккъалла а, цара суна Iесалла йи‚ уьш тIаьхьахIоьтти шен бахамо а‚ шен доьзало а шайна эшалла бен сов ца яьккхинчунна.
Цара йи тIех йоккха мекарло:
Цара элира: "Ма биталаш шайн делий а‚ ма виталаш Вадда а‚ СуваI а‚ ЯгIус а‚ ЯIукъ а‚ Наср а!"
/Нухьас доIа дира/: "Цара тилира дукханаш‚ зуламхой сов ма бахалахь тиларций бен".
Шайна гIалатех (къинойх) уьш хи чу бахийтира‚ тIаккха цIерга бахийтира‚ царна ца карийра Дела воцург гIоьнчий.
Нухьас элира: "Со кхиош-кхобуш волу сан Дела‚ Ахь ма виталахь лаьтта тIехь цатешачарах цхьа а цIа чохь вехаш верг.
Баккъалла а, Ахь уьш битахь, цара Хьан леш тилор бу‚ цара дуьненавоккхур вац къинош деш верг‚ тIех ца тешаш верг бен.
Со кхиош-кхобуш волу сан Дела‚ Ахь гечделахь суна а‚ сан денна-нанна а‚ муъмин хилла сан цIа чу ваьллачунна а‚ муъмин божаршна а‚ муъмин зударшна а‚ Ахь сов ма бахалахь зуламхой хIаллакбарций бен!"