69 - The Reality - Al-Ĥāqqah .
Бакъхилла доьжнарг.
ХIун ду и бакъхилла доьжнарг?
Стено хаийтина хьоьга /хIай Мухьаммад/‚ хIун ду и бакъхилла доьжнарг?
Самудаша а‚ Iадаша а харцдира тухуш дерг.
Амма самудаш а - уьш хIаллакбира /чIогIаллица/ дозанах беллачу мохьаца.
Ва амма Iадаш а – ткъа уьш хIаллакбира инзаре нуьцкъалчу т1ех шилачу мехаца.
Цо /нуьцкъалла/ балийтира и царна ворхI буса а‚ бархI дийнахь а тIеттIа. Хьуна гур бара нах оцу дийнахь /хIаллакбина/ дIасакхиссина‚ даьсса дисна (чохь хора йолу) хурманан диттан гIадаш санна.
Цхьа а бухадисар гуй хьуна царна?
Веара ФирIавн‚ цул хьалха мел верг а‚ муътафикаташа /беара/ къа деш.
Цара Iесалла йира шаьш Кхиош-кхобуш волчу Делан элчанна − тIаккха уьш схьалаьцира т1ех чIогIа долчу схьалацаро.
Оха хи дозанах даьлча, дихьира шу лелаш долчуьнца(кеманца).
Иза хилийтархьама шуна хьехам‚ тидаме долчу лерге тидаме эцийтархьама а.
Сурлекхча цхьана лакхарца‚
Латта а дIадихьча‚ лаьмнаш а /айдича/‚ царах аьтта х1ур бича цхьана атарца -
Оцу дийнахь дог1ур ду данза ца даьлларг (къематде).
Стигал йедар ю‚ оцу дийнахь хир ю иза ледаръяьлла (ч1аг1о йоцуш),
Маликаш хир ду цуьнан йисташкахула. Хьо Кхиош-кхобуш волчу хьан Делан Iарш хьур ю оцу дийнахь бархIамошайна т1ехула.
Оцу дийнахь шу хIоттор ду /кхиэлна/ хьалха‚ цхьа а хьуллеш хуьлу хIума хьулделла хир дац шух.
Амма шен жайна шега аьтту (бакъахьара) куьйга делларг‚ цо эр ма ду /ч1ог1а хазахетта/: "ХIей‚ схьадуьйла! Деша сан жайна!
Баккъалла а, со моьттушма вара /цхьана дийнахь/ сан хьесап суна дуьхьалкхетар дуйла".
Иза хир ву ша реза волчу дахарехь.
Лекхачу бешахь.
Шен стоьмаш гергахь болуш.
/Эр ду цаьрга/: "ГIоза даа‚ гIоза мала шайна /дуьненан/ дIадаханчу деношкахь шаьш хьалхадаьккхинарг /бахьанехь/ ".
Ва амма шен жайна шега аьрру (харцхьара) куьйга делларг‚ цо эр ма ду: "ЭхI! И сан жайна соьга ма деллехьара!
И сан /ч1ог1а суна дуьхьал долу/ хьесап хууш ца хиллехьара со.
Эх1! И сан /дуьненахь/ валар хиллехьара тIаьххьара‚ /со юха ден ца веш/.
Со кIелхьар ца ваьккхи сан бахамо.
ХIаллакхили соьгара сан долахь мел хилларг (сан уьйранаш а, сан хьал а)".
/Делан омра догIур ду/: "Схьалаца иза! ДIавихка иза!
Т1аккха жоьжахати чу д1авига иза.
ТIаккха шен яхалла кхузткъе итт дол йолчу зIайнах вихкина д1алалла иза".
Баккъалла а, иза вацара сийлахь-воккхачу Делах тешаш.
Мискачунна даа хIума дала /кхечарна/ дагадоуьйтуш вацара иза.
Вац цунна тахана кхузахь цхьа а доттагI.
Даа хIума дац диларш бен.
Уьш дуур дац гIалатбевллачара а бен.
ХIан-хIа! Ас дуй боу шуна гуш долчуьнца
Шуна гуш доцучуьнца а:
Баккъалла а, иза сийлахьчу элчанан дош ма ду (Делера цо дуьйцуш).
ШаIирандош ма дац иза‚ кIеззиг ду-кх шу тешаш дерг.
Бозбуунчин дош а ма дац иза‚ кIеззиг ду-кх аш ойла еш дерг.
Iаламийн Дегара охьадоьссина ду иза (Къуръан).
ЦоТхуна аьллехьара цхьацца (Оха аьлла доцу) дешнаш,
Оха схьалаьцна хир вара иза аьтту (бакъахьара) куьйга‚
ТIаккха хадийна хир бара цуьнан деган пха.
Шух цхьа а хир ма вацара цунах иза духатухуш.
Баккъалла а, иза (Къуръан) хьехам бу-кх /Делах/ кхоьруш болчарна.
Баккъалла а, Тхо хууш ду-кх шух /дин/ харцдеш берш буйла.
Баккъалла а, иза (Къуръан) г1айг1а ю-кх цатешачарна. (Цуьнга ийман диллинчарна хир долу ниIматаш гина пошме хир бу керстанаш къематдийнахь).
Баккъалла а, иза хьакъ-бакъдерг ду-кх!
Сийлахь-воккхачу хьуо кхиош-кхобуш волчу хьан Делан цIе хастае! (Массо а вочу сибатех ц1анве Иза).