68 - The Pen - Al-Qalam .
Нỳн. Дуй боу Ас къоламца а‚ цара /наха/ яздешдолчуьнца а:
Хьо ма вац /хIай Мухьаммад/ хьо Кхиош – Кхобучу (Делан) къинхетамца жинийх.
Баккъалла а, хьуна ма ю хадалур йоцу ял.
Баккъалла а, хьо ма ву сийлахь-доккха (хаза) гIиллакххьайгахь долуш.
ТIаьхьа гур ду хьуна‚ царна а гур ду‚
Мила ву шух питане лаьцнарг.
Баккъалла а, хьо Кхиош-кхобуш волу хьан Дела − Цунна дика вевза Шен некъах тилавелларг а‚ Цунна дика бевза нийсачу новкъахь берш а.
Хьо /хIай Мухьаммад/ муьтIахь ма хилалахь /дин/ харцдеш болчарна.
Уьш лууш бара хьо кIеда хила − тIаккха шаьш кIеда хир бара.
Хьо муьтIахь ма хилалахь массо а /харц/ дуйнаш дуккха боуш сийсаз- волчунна‚
/Х1ор/ луьйш волчунна /нахах таьхьашха/‚ /царна юккъехь/ меттанаш дIасакхуьйхьуш волчунна‚
Дикчу /хIуманна/ новкъарло еш волчунна‚ къинош деш дозанех ваьлла волчунна‚
Къизачунна‚ цул совнаха а шен дуьненвалар шеконехь долчунна(да мила ву ца хууш, боьха леларца вевзаш волчу).
Шен даьхни а, к1ентий а хиларца /Делан дозанех а ваьлла, кура а ваьлла и/.
Шена Тхан аяташ дийшича, цо элира: "Хьалхалерачийн туьйранаш ду хIорш".
Оха цуьнан мера тIе вастдуьллур ду.
Баккъалла а, Оха зийра уьш‚ Оха цхьана бешан дай зерах терра: цара дуй биира‚ шаьш /бешара/ стоьмаш бохур бу Iуьйранна‚ аьлла‚
"Дала мукъалахь" ца элира цара.
ТIаккха цунна (бешана) го тесира хьо кхиош-кхобуш волчу хьан Делера го тосуш долчо‚ уьш наб еш болуш.
/Егна/ Iаржъелларг санна Iуьйренга елира и /церан беш/.
Iуьйранга бевлича, вовшашка кхийкхира цара:
"Шайн беш чу гIо‚ шаьш стоьмаш бохур белахь"‚ аьлла.
Уьш болабелира, меллаша вовшашка луьйш:
"Тахана шуна тIе /шун беша/ цхьа а мисканиг ма вогIийла /стоьмаш боьхуш/".
Iуьйранна новкъа бевлира уьш, шайн дагахь /мисканиг/ духатоха ницкъ болуш.
Иза шайна /егна/ гича‚ цара элира: "Баккъалла а, вай тиладелла‚
ХIаъ‚ вай /и стоьмаш/ боцуш дисина".
Царах кхечарал Iедале волчо элира: "Ас ца аьллера шуьга: аш /Далла/ хастам бинехьара"‚ аьлла?
Цара элира: "Вонах цIена ву-кх и вай кхиош-кхобуш волу Дела‚ баккъалла а, вай хили-кх зуламхой".
Уьш вовшашна бехкаш бохуш дуьхьалбевлира.
Цара элира: "Ма бала бу вайна: вай хилира /Делан дозанех/ тIехдовлурш.
Вай кхиош-кхобуш волчу вай Дала вайна цул дикачуьнца /и беш/ хийцо а тарло. Баккъалла а, вай кхиош-кхобуш волчу вайн Делан /дикане/ догдохуш ду-кх".
Иштта ду Iазап‚ ткъа эхартан Iазап вуно доккха ду, уьш хууш хиллехь.
Баккъалла а, /Делах/ кхоьручарна шаьш кхиош-кхобуш волчу Далла гергахь ниIматийн бошмаш ю.
Ткъа Оха хуьлуьйту /Далла/ муьт1ахь болу нахкъинош дечарах тера?
Шуна хIун хилла /иштта ойла ял/? Аш муха хьукам до?
Я шуна жайна ду‚ аш шена чохь доьшуш /и хьукам/?
Баккъалла а, шуна цу /жайна/ чохь долуш аш мел хоржург?
Я шуна Тхоьца биъна дуйнаш бу къематде кхаччалц‚ баккъалла а, шайна аш дина хьукам хир долуш?
Хатта цаьрга /хIай Мухьаммад/‚ мила ву царах и чIагIдийриг.
Я церан накъостийбу? Схьабалабе цара шайн и накъостий, шаьш бакълуьйш хиллехь.
Оцу дийнахь настарш ерзина хир ю‚ уьш кхойкхур бу сужуде − царна могур дац‚ −
БIаьргаш охьадахна‚ сийсазалла тIейоьжна. Цаьрга сужуде кхойкхуш дара уьш могуш болуш.
Вита Со суо хIара хабар харцдеш волчуьнца. Оха схьалоцур бу уьш кIез-кIеззиг /хIаллакбарца/ царна ца хуучухула.
Ас хан лур ю царна. /Церан мекарлонна дуьхьал/ Сан мекарло чIогIа ю-кх.
Я ахь цаьрга мах боьху, уьш декхарша базбина болуш?
Я цаьргахь гушдоцург /девзаш Iилма/ ду, цара дIаяздеш?
Собар де хьуо Кхиош-кхобуш волчу хьан Делан хьукамна‚ ма хилалахь чIеран накъостахтера: цо /Деле/ кхийкхира ша /чIеран кийрахь пашмаллица/ гатвелла волуш.
Ша Кхиош-кхобуш волчун ниIмат шех ца кхиънехьара, иза кхоьссина хир вара /чIеран кийрара/ ара сийсаз а хилла.
Ша Кхиош-кхобуш волчо хаьржира иза‚ цо хилийтира иза дикачарах.
Цатешнарш кийча бу шайн бIаьргашца хьо хIаллакваншайна хьехам хезначул тIаьхьа‚ цара олу: "Баккъалла а, иза жинийх ву-кх".
Иза-м дац массо а Iаламна хьехам бен.