Седах /дуй боу Ас/, иза /лакхара/ охьабужуш:

Некъах д1а ца тили шун накъост (Мухьаммад пайхамар)‚ гала а ца вели.

Цо ца дуьйцу шегара /шена дезарг/-

Иза деккъа вехьий ду, цуьнга дIахоуьйтуш долу /Дала/.

Иза (Мухьаммад пайхамар) Iамийна ша ницкъаца чIогIа долчо.

Шегахь ницкъ болчо. Иза (Джабраил малик) нийсса дIахIоьттира.

Ша лекхачу анахьдолуш.

ТIаккха иза гергахилира /Мухьаммад пайхамарна адамийн куьцехь/‚ кхин тIех гергадера, /элчане вехьий дахьаш/.

Иза хилира /гергахь/ шина Iадан барамехь‚ я кхин герга.

Иштта вехьи дахьийтира Цо Шен лега‚ Ша дахьийтинарг.

Харц ца дира /пайхамаран/ даго шена гинарг.

Ткъа аш къуйсу цуьнца (пайхамарца) цунна гинчуьнца?

Цунна (Мухьаммад пайхамарна) иза гира кхин а охьадоссарехь(кхин цкъа дуссуш).

Чакхенан /дозанан/ лотос диттана гергахь.

Цунна гергахь ю /ялсаманин/ чугIойлан беш.

/Мухьаммад пайхамарна гира и дитт ша тамаше/ х1умнашахьулдечу хенахь.

ДIа ца тилина /пайхамаран/ бIаьрса‚ дозанах ца даьлла.

Цунна гира шен Кхиош-кхобучун даккхийчу аятех /аяташ/.

Аш дийцал суна Ал-латах а‚ Ал-Iуззах а,

Кхин кхозлагIа Манатаха. /Буй церан Делан санна ницкъ?/

Ткъа шуна божабераш ду‚ Цунна зудабераш ду?

Иза декъаза дāкъа ма ду.

Уьш еккъа цIерш ю аша а‚ шун дайша а техкина йолу. Дала цхьа а бакъо ца йоссина /царах лаьцна/. Уьш тIаьхьахIуьттуш ма бу деккъа шайн мотталуш долчунна а‚ /шайн/ дегнашна дезачунна а. Цаьрга ма беана шайн Кхиош-кхобучуьнгара нийса некъ.

Я адамна шена дезарг ду?

Делан ю тIаьхьарниг (эхарт) а, хьалхарниг (дуьне) а.

Маса малик ду стигланашкахь, шайн шапаIаташа хIумма а кIелхьардохур доцуш, Дала Шена луучунна пурба делча а бен‚ И реза хилча а бен!!

Баккъалла а, эхартах цатешачара йоккху маликех зударийн цIе.

Цуьнца цхьа а Iилма ма дац церан. Уьш тIаьхьахIуьттуш ма бу деккъа моттарна. Ткъа моттаро хIумма а хьалхадоккхур ма дац бакъдолчух.

Хьо дIаверза Тхан хьехамах юхавеллачух‚ дуьненан дахар бен шена ца дезаш волчух.

Иза ю церан Iилманах кхиаран дарж. Баккъалла а, хьо Кхиош-кхобург (хьан Дела) −Иза ву дика хууш Шен некъах тилавелларг а, Иза ву дика хууш ша нисвелларг а.

Делан ду стигланашкахь мел дерг а‚ лаьттахь мел дерг Цо бекхам бархьама вон хиллачарна цара динчуьнца‚ Цо бекхам бан дика хиллачарна уггар дикачуьнца.

Ишттанаш бу уьш, шаьш генабовлуш къинойх даккхичарах а‚ боьхучух а, кегийнаш бен /ца долуьйтуш шайгара/. Баккъалла а, хьо Кхиош-кхобург Шегахь шортта гечдар долуш ву-кх. Иза дика хууш ву шух дерг шу Ша лаьттах кхуллучу хенахь а‚ шу шайн нанойн кийрахь хIу долчу хенахь а. Шаьш цIан ма де −Цунна дика вевзаш ву /Делах/ кхоьруш верг!

Дийцал /хIай Мухьаммад/ цу /иманах/ юхаваьллачух.

КIеззиг /сагIа/ делларг‚ тIаккха дIакъевлинарг /сагIа ца луш/?

Ткъа цуьнгахь ду-те къайленан Iилма, цунна ган гуш?

Я цуьнга ца дийцина-те Мусан жайнашкахь дерг?

ИбрахIиман а /жайнашкахь дерг/‚ ша кхочушдина хилла волчу /шена Дала тIедихкинарш/

/Цуьнга ца дийцина-те/: хьур бац хьочо кхечун мохь‚ аьлла‚

Дац адамна ша къахьегнарг бен‚ аьлла‚

Цуьнан къахьегар тIаьхьа гур ду‚ аьлла‚

ТIаьхьа хир бу цунна сов нийса болу бекхам‚ аьлла‚

Хьо Кхиош-кхобучуьнга ю /хьан/ чакхе‚ аьлла‚

Баккъалла а, Иза ву воьлуьйтург а‚ /Иза ву/ воьлхуьйтург‚ аьлла.

Баккъалла а, Иза ву волуьйтург а‚ /Иза ву/ денвийриг‚ аьлла‚

Баккъалла а, Цо кхоьллина шишша −боьрша а‚ сте а‚ аьлла.

/Цхьана/ тIадамах, иза кхоссабелча /ненан кийрахь долчу беран цIа чу/‚ аьлла.

Цунна тIехь кхин цхьа кхоллар (белларш денбар) ду‚ аьлла.

Баккъалла а, Иза ву‚ аьлла‚ хьал делларг а‚ /шега/ тардайтинарг а /рицкъ/.

Баккъалла а, Иза ву СириусцIе йолу седа Кхобург (цуьнан Дела а)‚ аьлла.

Баккъалла а, Иза ву аьлла Ша хIаллакбинарг хьалхалера Iадаш.

Самудаш а‚ /цхьа а/ буха ца витира /царах/‚

Нухьан къам а‚ хьалха. Баккъалла а, уьш хилира вуно зуламе а‚ вуно дозанех бевлла а.

Муътафиката хьалаяьккхина охьатуьйхира Цо.

ДIахьулйира Цо уьш‚ Ша дIахьулйинарг.

Хьан Кхиош-кхобучун муьлхачу ниIматаца къуьйсу ахь‚ /хIай адам/?

ХIара (Мухьаммад пайхамар) кхерамча ву хьалхалерчу кхерамчех волуш.

ТIекхечи цIеххьана тIекхочург (къематде).

Ма вац цунна Дела воцург дIадоьллуш верг.

Ткъа цу хабарх а цецдовлу шу?

Доьлу шу? Ца доьлху шу?

Ма тIаламза ду шу (шайн хан эрна йойуш)!

Аш Далла сужд де‚ /Цунна/ Iибадат а де!