Ламанах/дуй боу Ас/.

МогIанашца яздинчу жайнаха /дуй боу Ас/,

Ша даржийначу аннийтIехь /яздина/ хилла долчу,

Шена зиярат дечу цIийнаха /дуй боу Ас/,

Айбина хилла болчу тховах (стигалах) а /дуй боу Ас/,

/Къематдийнахь цIарах/ буьззина хир болчу хIордах а:

Баккъалла а, хьо Кхиош-кхобучун Iазап доьжна ма ду (догIур долуш ма ду).

Ма дац цунна ша духатухург.

/Оцу къемат/дийнахь стигал дIатохалур ю тохаяларца,

Лаьмнаш а дIадолалур ду дIадоладаларца,

Бала бу-кх оцу дийнахь /дин/ харцдечарна,

Шаьш харцончохь ловзуш болчу.

Оцу дийнахь уьш кхойкхур бу жоьжахатин цIарга кхайкхарца.

/Эр ду цаьрга/: "ХIара ю и цIе‚ шу ша харцъеш хилла йолу.

Бозбуунчалла ду хIара я шу ца гуш ду?

Дāга цу чохь‚ собар де я ма де − цхьатерра ду шуна. Шуна бекхам беш бу аш еш хиллачу Iамалшца".

Баккъалла а, /Делах/ кхоьруш берш − /ялсаманин/ бошмашкахь а‚ ниIматашкахь а хир бу

Зовкх хьоьгуш шаьш Кхиош-кхобучо шайна деллачуьнца. Шаьш Кхиош-кхобучо жоьжахатин Iазапах ларбина уьш.

/Эр ду цаьрга/: "ГIоза даа‚ г1оза мала шайна шаьш еш хиллачу Iамалш бахьанехь".

Вовшашца могIаршца лаьттачу маьнганий тIе тевжина /хир бу уьш/. Оха бāлор бу царна хьурал Iинаш.

Шаьш ийман диллина хилла берш‚ шайн зуьррет а ийманца шайна тIаьхьахIиттина хилларш − царна тIекхиор ду Оха церан зуьррет а. Церан Iамалех хIумма а эшор а яц Оха. Массо а стаг а ша /дуьненахь/ карадинчуьнца закъалт ву.

Оха /хан мел ели/ латтор бу царна стоьмаш а‚ жижиг а царна дезаш хиллачух.

Цара вовшашка кхийдор бу чагIаран кад‚ шеца /и молуш/ даьсса къамелаш доцуш‚ къа а доцуш болу.

Царна /гIуллакх деш/ тIехьийзар бу кIентий-ялхой‚ шаьш Iалашдеш долу луълуъ санна болу.

Царах цхьаберш вукхарна тIебоьрзур бу, хоьттуш.

Цара эр ду: "Баккъалла а, тхо ма дара хьалха тхан доьзалах кхоьруш (уьш хIаллакхиларна).

Дала къинхетам бина тхох. Цо кIелхьардаьхна тхо самýманIазапах.

Баккъалла а, тхо дара хьалха /дуьненахь/ Цуьнга доIанаш деш. Баккъалла а, Иза ву диканиг а‚ кхинхетаме верг а".

/Керстанашна/ кхерам тасарна тIехь дāим латта! Хьан Делан ниIматаца хьо вац бозбуунча а‚ жинийх верг а.

Я цара олу: "Илланча ву. Хьовсар вай − замано дIалистар ву иза".

Ахь āла: "Хьовса шу. Со а шуьца цхьана хьовсачарах ву".

Я церан набаран гIенаша хьоьхуш ду-те и царна‚ я иза дозанах даьлла къам ду-те?

Я цара олу: "Цо кхоьллина иза?" ХIаъ‚ уьш ца теша-кх.

Цунах тера дийцар дахьийла цара, шаьш бакълуьйш белахь!

Я уьш хIумма йоцчу хIуманах кхоьллина бу‚ я уьш шаьш бу кхуллурш?

Я цара кхоьллина стигланаш а‚ латта а? ХIаъ‚ баккъалла а, ч1ог1а тешаш бац уьш.

Я цаьргахь ю хьан Делан хазнаш‚ я уьш бу урхалла деш?

Я цаьргахь лами бу‚ /уьш шеца Iарш тIе бовлуш/, ладугIуш цу чохь /дуьйцучуьнга/? Схьадалойла церан ладугIучо билгала делил!

Я Цуьнан мехкарий бу‚ шуна кIентий бу?

Я ахь цаьрга мах боьху, уьш декхарша базбина болуш?

Я цаьргахь къайле ю‚ цара дIаяздеш?

Я мекарло езаш бу уьш? Ца тешаш хилларш − царна йина мекарло!

Я церан АллахI (ц1е йолу цхьа Дела) воцург кхин дела ву? ЦIена ву и Дела цара /Шеца/ накъост лацарх!

Царна стиглара охьайогIуш кийсакаш гичи а‚ цара эр ма дара: "ТIеттIа йолу марха ю".

Бита уьш‚ шегахь ткъес йолу шайн денна дуьхьалкхетталц.

Оцу дийнахь церан мекарлос цхьанна хIуманах кIелхьарбохур бац уьш‚ царна гIо хир дац!

Баккъалла а, зулам диначарна цул совнаха Iазап хир ду‚ делахь а, царах дукхахболчарна ца хаьа-кх.

Хьан Делан хьукамна собаре хила. Хьо Тхан бIаьргий хьалхахь ву (Оха ларвеш ву хьо). Ахь хьан Далла хастам беш тасбахь де, хьуо хьалагIеттича.

Буса а тасбахь де Цунна‚ седарчий дIатилаш а /де тасбахь/.