Я сūн.

Ша хьикмате долчу Къуръанах дуй боу Ас:

Баккъалла а, хьо ма вубахкийтинчарах (цхьа элча)

Нийсачу новкъахь.

Ша веза а‚ къинхетаме а волчуьнгара охьадоссина ду иза (Къуръан)‚

Хьоьга хьехам байта къомана‚ шайн дайшна бина ца хилла −уьш гIовпал хилла (Делан дин ца девзаш).

Царах дукхахболчарна тIехь дошбакъхилла −цара /ахь деъначуьнга/ ийман дуьллур дац.

Церан логех Оха буржулаш -г1оматаш тоьхна‚ уьш чIенгийх (ч1енигех) кхаьчча, −церан кортош ирх айбелла.

Царна хьалхахула а‚ тIехьахула а дуьхьало йина Оха‚ церан бIаьргий хьалха кирхьа диллина Оха −уьш гуш ма бац.

Царна цхьатерра ду: ахь хьехам бича а‚ ца бича а −уьш тешар болуш бац /ахь деъначух, хIай Мухьаммад/.

Баккъалла а, ахь хьехам бе хьехамна тIаьхьахIуттуш волчунна‚ шена гуш воццушехь Къинхетаме волчух (Делах) кхоьруш волчунна. Ахь цуьнга кхаъ баккха цунна гечдина хиларца а‚ сийлахь ял хиларца а.

Баккъалла а, Оха ден ма бо белларш‚ дIа яз ма до Оха цара хьалха лелийнарг а (дахийтинарг а)‚ церан /тIаьхьа хир йолу/ лар а. Массо а хIума дIанис ма дина Оха билгалчу жайначохь.

Балабе царна масална цхьана юьртандай: цига баьхкира элчанаш.

Оха вахийтинера цаьрга шиъ−цара уьш шиа харцбира. ТIаккха Оха уьш чIагIбира кхоалгIачуьнца‚ цара элира: "Баккъалла а, тхо шуьга /дахкийтина/ элчанаш ма ду".

Цара (юьртара наха) элира: "Шу ма дац тхо санна адамаш бен. Цхьанна хIуманца Къинхетаме волчо дахкийтина ма дац шу −шу харцлуьйш ма ду".

Цара (элчанаша) элира: "Вайн Кхиош-кхобучунна хаьа-кх тхо шуьга даийтина элчанаш дуйла.

Тхуна тIехь-м дац билгалдерг дIакхачор бен".

Цара (юьртара наха) элира: "Шу бахьанехь вон билгалонаш хааелла тхуна‚ шу ца совцахь‚ оха шуна тIулгаш деттар ма ду‚ тхоьгара лазош долчу Iазапо схьалоьцур ма ду шу".

Цара элира: "Шун вон билгалонаш шуьца шайца ю. Ткъа шуна хьехам бина дела /ю шун вон билгалонаш; цундела до аш тхуна Iазап?/ ХIаъ‚ шу ду-кх тIаламза къам (дуккха кIорга дахна шу къинош дарехь)".

ГIалина йистера ведда цхьа стагсхьакхечира‚ цо элира: "ХIай сан къам! ТIаьхьахIитта оцу элчанашна.

ТIаьхьахIитта шайга мах ца боьхуш болчарна −уьш нийсачу новкъахь ма бу.

Ас хIунда ца до Iибадат суо Кхоьллинчунна‚ шу а Шена тIе дIадуьгур долчунна?

Иза а вуьтий‚ кхин делий тIелоцу ткъа ас? Къинхетаме волчунна (Далла) суна цхьа зен дан лиъча‚ церан шапаIаташа хIумма а гIо дийр ма дацара суна‚ цара со кIелхьарвоккхур ма вацара /Делан Iазапах/.

Ган а гуш долчу тиларчохь хир ма вара со тIаккха.

Баккъалла а, ас ийман дилли шун Кхиош-кхобучуьнга, соьга ладогIа…"

/Маликаша/ элира: "Ялсамане гIо". Цо элира /шен са долуш/: "ХIай сан къам‚ шу хууш хиллехьара-кх

Суна сан Кхиош-кхобучо гечдина хилар а‚ Цо со сийлахьболчарах хилийтар а".

Цул тIаьхьа цуьнан къоманна тIе стиглара бIо ца баийтира Оха‚ и боуьйтурш ца хилира Тхо.

Беккъа цхьа чIогIа мохь хилира −уьш /чим хилла/ дIатийна бисира.

Ма боккха бала бу-кх /Сан/ лешна: цхьа а элча ца веана-кх цаьрга, и цара хьийзавеш бен.

Царна ца го-техьа: мел дукха т1аьхьенаш хIаллакйина Оха царал хьалха‚ уьш царна тIе юхабоьрзур ма бац.

Массо а цхьана Тхуна хьалха дIахIиттор ма бу.

Билгала делил ма дуй царна делла долу латта: Оха иза дендина‚ цунах Оха буьртигаш а схьадаьхна −царах цара кхача боу.

Цунна тIехь Оха хурманийн а‚ кемсийн а бошмаш хIиттийна. Цунах Оха шовданаш а даьхна −

Цаьрга цуьнан стоьмаш баийта −церан куьйгаша ца дина иза. Баркалла хIунда ца олу цара?

Ц1ена вуИ(Дела массо а кхачамбацарех)‚ Ша массо а хIума боьрша а‚ стеа‚ кхоьллина волу: лаьтто схьадолуьйтуш дерг а‚ уьш шаьш а‚ царна цахуург а.

Билгала делил ду царна буьйса: цунах де схьадоккху Оха‚ т1аккха уьш боданехь буьсуш.

Малх а дIалела шена хIоттинчу меттиге −Ша веза волчун‚ Ша хууш волчун дIахIоттам бу иза.

Беттан а барам бина Оха шен манзалашкахь−дIабоьрзуш хурманан ширчу гах тарлой.

Малх баттана тIаьхьа ца кхуьу‚ буьйса дийнал хьалха ца йолу −массо а шен-шен меттехь нека деш ю.

Билгала делил ду царна Оха церан зуьррет дуьззина хиллачу /Нухьан/ кемана тIехь д1асалелийна хилар.

Цунах тера кхоьллира Оха царна уьш тIе хаа хIуманаш а.

Тхуна лиънехьара‚ хи чу бахийтина хир бара уьш‚ −ма хир дацара царна орца‚ ма кIелхьарбохур бацара уьш

Тхоьгара къинхетам а‚ цхьа хан тIекхаччалц бахам а хилча бен.

Цаьрга аьлча: "Шу кхералаш шун хьалха хиллачух а‚ шун тIаьхьа хирдолчуха −шух къинхетам бан там бара" /уьш дIабоьрзу/.

Делан аятех цхьа а аят ца догIу цаьрга‚ уьш цунах дIабоьрзуш а бен.

Цаьрга аьлча: "Саг1а ло /мискачарна /Дала шайна деллачу рицкъах," цатешачара олу ийман диллинчарах: "Оха хIунда кхобу уьш? Дала,Шена лаахь,Ша кхобур бу‚ ган а гуш тиларчохь ду-кх шу".

/ТIаккха/ цара олу: "Маца хир ду иза аш дуьйцург, шу бакълуьйш хиллехь?"

Хьоьжуш лаьттар бац уьш −беккъа цхьа чIогIа мохь хир бу: цо схьалоцур бу уьш,шаьш лаьтташехь къуьйсуш.

Весет дан а ницкъ кхочур бац царна‚ шайн нахана тIе юхабоьрзур а бац уьш.

Сурлокхур ю−уьш кешнашкара шайн Кхиош-кхобучунна тIе сихлур бу.

Цара элира: "Ма боккха бала беана вайна! Хьан гIовтина-те вай‚ дийшина Iохкучуьра?!" /Маликаша я муъмин наха эр ду/: "ХIара ду шуна Къинхетам болчохир ду аьлларг. Бакълина элчанаш".

Беккъа цхьа чIогIа мохь хилла −уьш берриге а Тхуна хьалха дIатарбелла.

Тахана синна цхьанна хIуманца зулам дийр ма дац‚ аш йинчу Iамалшца бен бекхам а шуна хир ма бац.

Баккъалла а, ялсаманин дай тахана /шайн/ гIуллакхашкахь зовкх хьоьгуш хир бу.

Уьш а‚ церан зударий а IиндагIехь маьнганашна тIетевжина лаьттар ма бу.

Царна цигахь стоьмаш а‚ царна шаьш ехнарг хир ма ю.

"Салам!" −олуш маршалла хир ду къинхетаме волчу Делера.

Шу дIакъаста тахана‚ хIай къинош динарш!

Ас шуьга ца аьллера ткъа: "ХIай Āдаман кIентий! ШайтIанна Iибадат ма делаш −иза шуна билгала мостагI ма дуй?

Суна Iибадат дейша −хIара бу нийса некъ!"

Шух йоккха тоба тилина даьлла и! −Шу ца хили-кх хьекъале?

ХIара ю и жоьжахате‚ хир ю шуна‚ аьлла хьехийнарг!

Iовша цуьнан йовхо тахана−шаьш цатешаш хиларна!

Тахана Оха церан багенашна мухIар тухур ма ду‚ церан куьйгаша Тхоьга дуьйцур ма ду‚ цара /дуьненахь/ карадеш хиллачунна когаша тешалла дийр ма ду.

Тхуна лиънехьара,бIаьрса дехьна уьш буьтур бара‚ новкъах тилла бисинчу царна мичара гур дара?

Я Тхуна лиънехьара, шайн меттигехь куьцаш хуьйцур ма дара церан −дIабахалур ма бацара уьш‚ юхабоьрзур а ма бацара уьш.

Оха вāха витинарг къаналле д1аверзаво,уьш хьекъале ца хуьлу-те?

Ца Iамийна Оха цунна (Мухьаммад пайхамарна) иллеш−и дан цо там а ма бацара: иза хьехам а, /хIумнаш/ билгалдоху Къуръан а ма ду‚

Шеца кхерам таса дийнаволчунна‚ цатешначарна тIехь /царна Iазап хир ду аьлла/ дош бакъхилийта.

Царна ца го-техьа Оха шайна Тхан куьйгаша динчух даьхни кхоьллина хилар‚ уьш царна тIехь дай а бина?

Оха уьш царна муьтIахь хилийтина: царах уьш тIехуьйшурш а ду‚ царах цара доу.

Царна цаьргахь пайданаш а‚ маларш а ду −баркалла хIунда ца олу цара?

АллахI-Дела а витина кхин делий лаьцна −шайна гIо хир ду моьттуш.

Хир дац царна цаьргахула гIо −ма бу уьш царна дIахIоттина бIо.

Церан дашо сингаттаме ма войла хьо. Тхо хууш ду хьуна цара къайладоккхург а‚ цара дIахьедийриг а.

Адамнаца го-те Оха ша кхоьллина хилар тIадамах? −билгала мостагI хили-кх цунах!

Тхуна масал а далийна‚ ша кхоллар диц а дина‚ аьллера: "Хьан денйийр ю даьIахкаш,уьш яхкаелча?"

Ахь āла: "Денйийр ю уьш шаьш дуьххьара кхоьллинчо −Иза массо а хIума кхолла Ша хууш ма ву.

Иза ву шуна сийначу диттах цIе хилийтина‚ −аш цунах лата а еш".

Ткъа стигланаш а‚ латта а Ша кхоллинчунна ницкъ ца кхочу и саннарг юха кхолла?! Кхочу!!! И ша дика хууш кхоллархо ма ву!

Цуьнан гIуллакх ду Шена цхьа хIума лиъча,цуьнга"Хила!" āлар −т1аккха иза хуьлу.

Ц1ена вуИ (Дела массо а кхачамбацарех)‚ Шен куьйгахь массо а хIуманан паччахьалла долу‚ шу а Шена тIе дIадерзор долу.