32 - The Prostration - As-Sajdah .

Алиф-лāм-мūм.

Жайна охьадоссор /ду хIара/‚ шена чохь шеко йоцуш‚ Iаламийн Дегара.

Я цара олу: "Цо (Мухьаммада) кхоьллина /харцдерг/ ду иза"? ХIаъ‚ иза бакъдерг ду хьан Кхиош-кхобучуьнгара ахь къомана кхерам тасархьама‚ хьол хьалха шайга цхьа а кхерамча веана воцчу‚ уьш нийсачу новкъа хIуттур бацара-те?

Дела ву Ша стигланаш а‚ латта а, цу шинна юккъехь мел дерг а кхоьллинарг ялх дийнахь‚ тIаккха дIанисвелира Иза IаршатIехь. Ма вац шуна Иза воцург цхьа а вали а (доттагI)‚ цхьа а гIодаккхархо а‚ аш ойла ца йо-те?

Омра дIасадоькъу Цо стиглара лаьтта тIе‚ тIаккха иза (омра) Цунна тIе айло дийнахь‚ шен барам эзар шо долуш аш дагардечу кепара.

Иза ву хьуламехьдерг а, гучахьдерг а хууш верг а. Веза верг а‚ къинхетаме верг а /ву Иза/.

Иза ву Ша мел кхоьллинарг хазчу куьцара дина. Адам кхолла волавелла Иза поппарах.

ТIаккха цуьнан т1аьхье хилийтира Цо ладамбоцчу хинан тIадамах.

ТIаккха Цо иза нисвира‚ Цо диллира цу чу Шен сих /са/‚ Цо хилийтира шуна хазар а‚ бIаьрса а‚ дегнаш а. Ма кIеззиг ду-кх аш шукур дийриг.

Цара элира: "Тхо дайча лаьттахь‚ тхо керлачу кхолларехь хир дуй (юхадендийр дуй)?" ХIаъ‚ уьш шайн Кхиош-кхобучунна дуьхьалкхетарна керстахили.

Ахь āла: "Долуьйтур ду шу даларан малико‚ ша шуна тIе хIоттина долчу‚ тIаккха шайн Кхиош-кхобучунна тIе шу дIадерзор ду.

Хьуна гуш балхьара и къинош дийнарш шайн кортош охьатаIина шайн Кхиош-кхобучунна хьалхахь /олуш/: "Тхан Кхиош-кхобург‚ гина тхуна‚ хезна тхуна‚ юхадерзадехь тхо /дуьнен чу/ −дика Iамал йийр яра оха‚ тхо /хIинца шеко йоццуш/ тешна ду".

Тхуна лиънехьара, Оха лур бара хIор сине шен нийса некъ‚ делахь а, бакъхили-кх Соьгара дош: "Юзанне а юзор ма ю Ас жоьжахати жинех а, нахах а- /царах Далла 1еса хиллачарах/ массарах а".

Iовша /Iазап/ хIокху шайн /къемат/ денна дуьхьалкхетар аш дицдарна - Оха шу а дицдина. Iовша гуттаренан Iазап шаьш /дуьненахь/ деш хилларг бахьанехь.

Баккъалла а, тешаш бу Тхан аятех, шайна уьш хьехийча, сужудане бегаш берш‚ шайн Кхиош-кхобучунна хастам барца тасбахь деш берш‚ шаьш кура а ца бовлуш.

Церан агIонаш айло /буьйшачу/ меттигашкара‚ шайн Кхиош-кхобучуьнга кхойкху цара (Цуьнан Iазапах) кхерарца а‚ (Цуьнан къинхетаме) догдахарца а‚ Оха шайна деллачу рицIкъех /дикчу агIора/ харжаш йо цара.

Ца хаьа синна‚ хIун шайна хьулйина ю бIаьргашна езачарах шаьш йина хиллачу Iамална дуьхьал.

Ткъа муъмин стаг хилла песакхстагах тера? Нис ца ло уьш.

Ткъа ийман диллинарш а‚ дика Iамалш йинарш а −царна бошмаш ю чугIойла‚ хьешана санна кечйина йолу цара йина хилла Iамал бахьанехь.

Ткъа песакх хилларш а −церан чугIойла /жоьжахатин/ цIе ю. Царна цу чуьра арабовла мел лии, −цу чу юхаберзор бу уьш‚ цаьрга эр ду: "Iовша шайна цIеран Iазап‚ шаьш иза харцдеш хилла долу".

Оха Iовшанне а Iовшийтур ма ду цаьрга дайа Iазап/эхартан/ доккха Iазапал хьалха, юхабоьрзур бацара-те уьш /къиношдечух/.

Ткъа мила ву зуламе шен Кхиош-кхобучун аяташ шена хьехадеш тIаккха царах дIавоьрзуш волчул? Баккъалла а, Тхо къинош диначаьргара бекхам оьцур берш ма ду.

Оха деллера Мусага жайна −хьо ма хилалахь шеконехь цуьнца вовшахкхетарна. Оха хилийтира цунах (Тавратах) нийса некъ Исраилан кIенташна.

Оха хилийтира царах имамаш‚ шаьш нисбелла болу Тхан омраца, шаьш собаре хиллачул тIаьхьа. Уьш хилира Тхан аятех ч1ог1а тешаш.

Баккъалла а, хьан Кхиош-кхобучо къастор ду царна юккъехь къематдийнахь церан хиллачу хилпалонехь.

Ткъа Оха царал хьалха мел хIаллакйинчу тIаьхьенаша а нис ца бо-те уьш /бакъдолчунна тIе/? Уьш д1асалелаш ма бу церан гIишлошкахула. Баккъалла а, цу чохь /Тхо бакъхиларан/ делилаш ду-кх! Царна ца хозу-те?

Царна ца хаьа-те Оха д1алоллу хи /дакъаделла/ этIачу лаьттана тIе‚ цуьнца ялта арадолуьйту −цунах ма дуу церан бежнаша а‚ цара шаьш а?! Царна ца го-те?

Цара (дин харцдечара) олу: "Маца хир бу /шуна/ толам/тхуна тIехь/, шу бакълуьйш хиллехь?"

Ахь āла: "Толаман дийнахь пайда бийр бац цатешачарна церан иймано‚ уьш тIаьхьатоттур а бац" /тōба дан/.

ДIаверза царах‚ хьоьжуш Iелахь‚ уьш бу хьуна хьоьжуш Iеш.