Qoof. Ulug` Qur'on ila qasam.

Balki, ularga o`zlaridan ogohlantiruvchi kelganidan ajablandilar va kofirlar: «Bu ajib narsa-ku?» – dedilar.

O`lib, tuproq bo`lganimizdan keyin ham-a? Bu qaytish (aqldan) uzoq.

Haqiqatan, Biz ularni yer kamaytirayotganini bildik va Bizning huzurimizda saqlovchi kitob bor.

Aniqki, ularga haq kelganda, uni yolg`onga chiqardilar. Bas, ular iztirobli ishdadirlar.

Ustilaridagi osmonga nazar solmaydilarmi? Uni qanday bino qilibmiz va ziynatlabmiz? Va (holbuki), uning teshiklari ham yo`q?!

Va yerni cho`zib qo`ydik, unga tog`larni tashladik va unda turli go`zal juftlarni o`stirdik.

(Robbisiga) qaytuvchi har bir bandaga ko`rgazma va eslatma qilib...

Va osmondan baraka suvini tushirdik hamda u bilan bog`-rog`larni va don hosilini o`stirdik.

Va zich mevali shingillari bor xurmolarni ham.

Bandalarga rizq qilib. Va u (yomg`ir) bilan o`lgan shaharni tiriltirdik. Shunday bo`ladir (qabrdan) chiqish ham.

Ulardan avval Nuh qavmi, quduq sohiblari va Samud yolg`onga chiqarganlar.

Va Od, Fir'avn, Lut birodarlari.

Va daraxtzor egalari va Tubba' qavmi — barchalari Payg`ambarlarni yolg`onga chiqarganlar. Bas, (azob) va'dam haq bo`ldi.

Avvalgi yaratishga ojiz bo`l-dikmi? Yo`q! Ular yangidan yaratilishga shubhadadirlar.

Albatta, insonni Biz yaratganmiz va uning nafsi nimani vasvasa qilishini ham bilurmiz. Va Biz unga jon tomiridan ham yaqinmiz.

Vaqtiki ikki kutib oluvchi o`ngda va chapda o`tirgan hollarida kutib olurlar.

Biror so`z aytmas, magar huzurida hoziru nozir borlar.

O`limning mastligi (talvasasi) haqiqat bo`lib keldi. Sen qochib yurgan narsa shuldir.

Va sur ham chalindi. Bu, qo`rqitilgan kundir.

Va har bir jon haydaguvchi va guvohlik beruvchi bilan keldi.

Albatta, sen bundan g`aflatda eding. Bas, Biz sening pardangni ochdik va bugun ko`zing o`tkirdir.

Va uning «yaqini»: «Mana bu mendagi tayyor narsa», dedi.

Har bir qaysarni, kofirni jahannamga tashlang!

Yaxshilikni man qiluvchini, tajovuzkorni, shak keltiruvchini.

Alloh bilan birga boshqani iloh qilib olganni shiddatli azobga tashlang!

Uning «yaqini»: «Robbimiz, uni men tug`yonga ketkazganim yo`q, lekin uning o`zi uzoq zalolatda bo`ldi», der.

U zot dedi: «Mening huzurimda tortishmanglar, sizlarga azob va'dasini taqdim qiluvdim.

Mening huzurimda gap o`zgarmas va Men bandalarga zulm qilguvchi emasman».

Bugun jahannamga: «To`ldingmi?» desak, u: «Yana qo`shimcha bormi?» der.

Va jannat taqvodorlarga uzoq bo`lmagan joyga yaqinlashtirildi.

Bu — sizga va'da qilingan narsadir. Har bir sertavbaga va saqlovchiga.

Rohmandan g`oyibona qo`rqqan va salomat qalb ila kelgan kimsaga.

«Unga salomat bo`lgan holda kiringiz. Bu — mangulik kunidir» (deyilur).

U yerda nima xohlasalar, ularniki. Va huzurimizda ziyodasi bor.

Ulardan avval, ulardan ko`ra kuchliroq asr(avlod)lardan qanchasini halok qildik. «Qochadigan joy bormi?» deb yurtma-yurt kezib chiqdilar.

Albatta, bunda qalbi borlarga va zehn bilan quloq osganlarga eslatma bordir.

Albatta, osmonlaru yerni va ularning orasidagi narsalarni olti kunda yaratdik. Va Bizni charchoq tutmadi.

Ularning aytayotganlariga sabr qil va Robbingga quyosh chiqishi va botishidan avval hamdu tasbih ayt.

Kechasida ham Unga tasbih ayt. Va sajdadan keyin ham.

Nido qiluvchi yaqin joydan nido qilgan kunda quloq os.

U kunda qichqiriqni haq ila eshiturlar. Ana o`sha, chiqish kunidir.

Albatta, Biz tiriltirurmiz, o`ldirurmiz. Va qaytish ham Bizgadir.

U kunda ustlaridagi yer yorilib, shoshib chiqurlar. Ana o`sha, Biz uchun oson to`plashdir.

Ularning aytganlarini Biz biluvchimiz. Sen ularning ustidagi jabbor emassan. Bas, Qur'on ila azob va'damdan qo`rqqanlarni ogohlantir.