Далла тасбахь дина стигланашкахь мел долчо а‚ лаьттахь мел долчо. Иза веза верг а‚ хьукам /нийса/ деш верг а ву.

ХIай ийман диллинарш! Аш хIунда дуьйцу шаьш деш доцург?

Йоккха хилла оьгIазло Далла гергахь аш āлар шаьш деш доцург.

Баккъалла а, Далла беза Шен новкъахь тIом беш берш цхьа могIа бина, шаьш чIагIйина гIишло санна.

Мусас ма элира шен къоме /ахь хьахаде иза‚ хIай Мухьаммад‚ хьан нахе/: "ХIай сан къам‚ аш хIунда суна халахоьтуьйту? Шу хууш ма дуй со шуьга /ваийтина/ Делан элча вуйла". Уьш /бакъдолчух/ дIабирзича − Дала дIадерзира церан дегнаш /бакъдолчух/. Дала нис ца до песакъ къам.

Марьяман кIанта Iийсас ма элира‚ /ахь дагадайта иза хьан нахе‚ хIай Мухьаммад/: "ХIай Исраилан кIентий! Баккъалла а, со шуьга /ваийтина/ Делан элча ву-кх‚ бакъдеш сол хьалха хилла Таврат а‚ кхаъ боккхуш сол тIаьхьа вогIур волчу элчанца, шен цIе Ахьмадйолуш". ТIаьхьа иза шайга веъча билгалонашца‚ цара элира: "ХIара билгала бозбуунчалла ду".

Мила ву зуламе ша Далла тIехь харцдерг кхоьллина волчул‚ ша /Далла/ муьт1ахь хиларе (ислам дине) кхойкхуш а волуш? Дала нис ца до зуламе къам.

Уьш лууш бу шайн багенашца Делан нур дайа. Дала кхочушдо Шен нур, цатешачарна и мел ца дезахь.

Иза ву вахийтинарг Шен элча нийсачу некъаца а‚ бакъдолчу динца и толийтархьама массо а дина тIехь, мушрикунашна иза мел ца дезахь а.

ХIай ийман диллинарш! Ас нисдой шу йохка-эцарна тIе, цо шу кIелхьарадохур долуш лазош долчу Iазапах? /Иза :/

Шу Делах а‚ Цуьнан элчанах а тешар ду‚ аш Делан новкъахь къахьегарду шайн бахамца а‚ синошца а. Иза дика ду шуна, шу хууш хиллехь.

Цо (Дала) гечдийр ду шуна къинош‚ чудохуьйтур ду бошмашна‚ шайна бухахула хиш оьхуш долчу‚ Iадн ялсаманин цIенчу гIишлошна. Иза сийлахь-боккха толам бу-кх!

Кхин /ниIмат хир ду/, шуна ша дезаш долу − Делера гIо а‚ гергара толам а. Ахь кхаъ баккха муъмин нахана.

ХIай ийман диллинарш! Шу хилалаш Делан гIоьнчий, Марьяман кIанта Iийсас шен мутаIелимашка аьлла хиларх терра: "Муьлш бу Делан аг1оргахьа сан гIоьнчий?" МутаIелимаша элира: "Тхо ду Делан гIоьнчий". Исраилан кIентех цхьана тобано ийман диллира‚ /кхечу/ тобано керстаналла дира. ТIаккха Оха чIагIбира ийман диллинарш церан мостагIчунна тIехь − уьш хилира толам баьккхинарш /делилашца а, билгалонашца а/.