ߞ߫. ( ߞ߫ߊ߯ߝ. ) ߸ ߊ߰ ߒ ߣߌ߫ ߞߎ߬ߙߊ߬ߣߊ߫ ߡߌ߬ߙߌ߲߬ߡߊ ߕߍ߫.
ߍ߲߬ߍ߲߫ ߸ ( ߊ߬ ߡߊ߫ ߛߋ߫ ߞߊ߬ߟߌ߬ߟߌ߫ ߘߐ߫ ) ߸ ߊ߬ߟߎ߬ ߓߘߊ߫ ߞߓߊ߫ ߟߋ߬ ߞߏ߫ ߖߊ߬ߛߙߋ߬ߡߊ߬ߟߌ߬ߟߊ ߓߘߊ߫ ߣߵߊ߬ߟߎ߫ ߡߊ߬ ߸ ߞߊ߬ ߓߐ߫ ߊ߬ߟߎ߫ ߖߍ߬ߘߍ ߘߐ߫ ، ߓߊ߲߬ߓߊ߮ ߟߎ߬ ߞߊ߲߫ ߏ߬ ( ߟߋ ߘߐ߫ ߸ ) ߞߏ߫ ߣߌ߲߬ ߦߋ߫ ߞߏ߫ ߡߊߞߓߊߣߍ߲߫ ߠߋ߬ ߘߌ߫ ߘߋ߬؟.
ߌ߬ߦߏ߯ ߊ߲ ߛߊ߬ߣߍ߲ ߞߐ߫ ߡߎߣߎ߲߬ ߞߵߊ߲ ߞߍ߫ ߓߎ߰ߘߌ ߘߌ߫؟ ، ߒ߬ߓߊ߬ ߏ߬ ߞߐߛߊߦߌ߲߫ ߦߙߐ ߞߊ߫ ߖߊ߲߬ ߞߟߋ߫.
ߒ߬ߠߎ߫ ߘߏ߲߬ ߞߵߊ߬ ߟߐ߲߫ ߸ ߘߎ߱ ߦߋ߫ ߡߍ߲ ߣߊ߰ߛߌ߬ ߟߴߊ߬ߟߎ߫ ( ߝߊ߬ߘߌ ) ߘߐ߫ ، ߓߊߏ߬ ߟߊ߬ߕߊ߲߬ߞߊ߬ߟߌ߬ ߟߍߙߊ ߟߋ߫ ߒ߬ߠߎ߫ ߕߍ߰ߟߊ ߘߐ߫.
ߍ߲߬ߍ߲߫ ߸ ߕߎ߬ߢߊ ߣߊ߬ߣߴߊ߬ߟߎ߫ ߡߊ߬ ߸ ߊ߬ߟߎ߫ ߞߵߏ߬ ߡߊߛߐ߬ߛߐ߬ ، ߏ߬ ߘߐ߫ ߸ ߊ߬ߟߎ߬ ߦߋ߫ ߞߏ߫ ߢߊ߯ߡߌ߲ߣߍ߲߫ ߠߋ߬ ߘߐ߫.
ߦߊ߯ߟߴߊ߬ߟߎ߬ ߕߍ߫ ߛߊ߲ ߡߊߝߟߍ߫ ߟߴߊ߬ߟߎ߫ ߞߎ߲߬ߘߐ߫ ߓߊ߬ ߸ ߊ߲ ߣߵߏ߬ ߟߐ߬ ߟߊ߫ ߢߊ ߡߍ߲؟ ߊ߬ ߣߴߊ߲ ߞߵߊ߬ ߡߊߢߍ߯ߙߍ߫ ߸ ߥߏ߬ߘߊ߫ ߟߎ߫ ߘߏ߲߬ ߕߍ߫ ߊ߬ ߟߊ߫؟.
ߊ߬ ߣߴߊ߲ ߞߊ߬ ߘߎ߱ ߘߐߝߎߟߋ߲߫ ߞߊ߬ ߕߌ߲ߘߌ ߟߎ߬ ߟߊߝߌ߬ߟߌߝߌ߬ߟߴߊ߬ ߢߊߝߍ߬ ߸ ߊ߬ ߣߴߊ߲ ߞߊ߬ ߝߌ߬ߟߊ߬ߓߊ߫ ߗߋ߲߭ ߓߍ߯ ߘߏ߫ ߟߊߝߍߘߍ߲߫ ߊ߬ ߞߊ߲߬.
ߞߵߏ߬ ߞߍ߫ ߢߟߊߞߊ߫ ߞߏ߫ ߣߌ߫ ߕߊ߰ߛߌ߬ߟߌ߫ ߘߌ߫ ߖߘߍ߬ߟߛߊ߬ߦߌ߲߬ ߖߐ߲ ߘߊ߬ߡߊ ߦߋ߫.
ߊ߲ ߞߊ߬ ߖߌ߫ ߓߙߊߞߡߊ ߟߊߖߌ߰ ߞߊ߬ ߓߐ߫ ߡߐ߲ߕߐ߲ ߘߐ߫ ߸ ߏ߬ ߞߍ ߊ߲ ߞߊ߬ ߣߊߞߐ ߟߎ߬ ߟߊߝߍߘߍ߲߫ ߏ߬ ߟߊ߫ ߸ ߊ߬ ߣߌ߫ ߢߊ߯ߡߊ߫ ߞߊ߬ߕߊ ߟߎ߬.
ߊ߬ ߣߌ߫ ߕߡߊߙߏߛߎ߲߫ ߖߊ߲ߓߊ ߟߎ߬ ߸ ߝߎ߲ߘߌ߫ ߕߛߐ߬ߞߘߐ߬ߡߊ߬ߣߍ߲ ߠߎ߬ ߦߴߏ߬ ߟߎ߬ ߟߊ߫.
( ߞߵߏ߬ ߟߎ߬ ߞߍ߫ ) ߓߊߟߏ ߘߌ߫ ߖߐ߲߭ ߠߎ߬ ߦߋ߫ ، ߊ߲ ߞߊ߬ ߝߊ߲߬ߞߣߐ߫ ߛߊ߬ߣߍ߲ ߠߎ߬ ߟߊߣߌߡߦߊ߫ ߏ߬ ߟߊ߫ ، ߒ߬ߓߊ߬ ߓߐߟߌ ߞߍߕߐ߫ ߕߋ߲߬ ߠߋ߬ ( ߛߊ߬ߙߌ ߟߎ߬ ߘߐ߫ ).
ߣߎ߯ߤߎ߲߫ ߡߌ߬ߙߌ߲߬ߘߌ ߞߊ߬ ߡߊ߬ߛߐ߬ߛߐ߬ߟߌ ߞߍ߫ ߢߌ߲߬ ߠߎ߬ ߢߍ߫ ߞߘߐ߬ߡߊ߲߫ ، ߊ߬ ߣߌ߫ ߞߐ߬ߟߐ߲ ߘߏ߲߬ߞߏ ߟߎ߬ ߣߌ߫ ߛߊ߬ߡߎߘߊ ߟߎ߬.
ߊ߬ ߣߌ߫ ߊ߯ߘߌ ߟߎ߬ ߣߌ߫ ߝߋߙߊߥߎ߲߫ ߣߌ߫ ߟߎߕߌ߫ ߓߊߘߋ߲ ߠߎ߬.
ߊ߬ ߣߌ߫ ߛߓߋ߬-ߕߎ߫ ߘߏ߲߬ߞߏ ߟߎ߬ ߣߌ߫ ߕߎߓߊߌ߲߫ ߡߌ߬ߙߌ߲߬ߘߌ ، ߏ߬ ߟߎ߫ ߞߋ߬ߟߋ߲߬ߞߋ߬ߟߋ߲߬ߣߊ ߓߍ߯ ߞߊ߬ ߞߋߟߊ ߟߎ߬ ߡߊߛߐ߬ߛߐ߫ ߟߋ߬ ، ߏ߬ ߞߍ ߸ ߒ ߠߊ߫ ߞߐ߲߬ߞߐ߲߬ߒ߬ߡߊ߬ߞߊ߲ ߜߋ߲ߜߋ߲ߦߊ߫ ߘߊ߫ ( ߊ߬ߟߎ߫ ߞߊ߲߬ ).
ߋ߫ ߸ ߦߊ߯ߟߊ߫ ߊ߲ ߛߍ߰ ߘߊ߫ ߟߋ߬ ߘߊ߲ߠߌ߲߫ ߝߟߐ ߓߟߏ߫ ߓߊ߬؟ ߍ߲߬ߍ߲߫ ߸ ߞߏ߬ߣߌ߲߬ ߊ߬ߟߎ߬ ߦߋ߫ ߞߎߛߎ߲ ߠߋ߬ ߘߐ߫ ߘߊ߲ߠߌ߲߫ ߞߎߘߊ߫ ( ߞߏߢߊ ) ߘߐ߫.
ߖߊ߯ߕߋ߬ ߸ ߒ߬ߠߎ߫ ߟߋ߫ ߞߊ߬ ߡߐ߱ ߘߊ߲߫ ߸ ߒ߬ ߘߏ߲߬ ߞߵߊ߬ ߟߐ߲߫ ߊ߬ ߣߌ ߦߋ߫ ߘߐߗߍ߫ ߟߊ߫ ߡߍ߲ ߠߊ߫ ، ߓߊ ߊ߲ ߛߎ߬ߘߎ߲߬ߡߊ߲߫ ߊ߬ ߟߊ߫ ߞߊ߬ ߕߊ߬ߡߌ߲߬ ߞߊ߲ ߣߊ߬ߝߏ߬ߟߏ߲߬ߓߊ ߖߎ߬ߟߎ ߟߊ߫.
( ߊ߲ߠߎ߫ ߛߎ߬ߘߎ߲߬ߡߴߊ߬ ߟߊ߫ ߟߋ߬ ) ߞߊ߬ߦߌ߯ ߕߎ߬ߡߊ ߡߍ߲ ߸ ߟߊ߬ߡߌ߬ߘߊ߬ߟߌ߬ߟߊ߫ ߝߌ߬ߟߊ ߦߋ߫ ߟߊ߬ߡߌ߬ߘߊ߬ߟߌ ߞߊ߲߬ ߸ ߊ߬ߟߎ߫ ߛߌ߰ߣߍ߲߫ ، ߘߐ ߦߋ߫ ߞߌߣߌ߲ ߝߍ߬ ߸ ߘߐ ߦߋ߫ ߣߎߡߊ߲ ߝߍ߬.
ߊ߬ ߕߍ߫ ߞߎߡߊ߫ ߛߌ߫ ߝߐ߫ ߸ ߣߌ߫ ߞߣߐ߬ߜߍ߲߬ߠߊ߫ ߢߣߊߓߊ߯ ߕߍ߫ ߡߍ߲ ߘߊ ߘߐ߫.
( ߘߊ߬ߡߊ߲߬ߛߊ߫ ) ߛߊ߬ߦߊ ߞߊ߬ߟߏ ߘߌ߫ ߣߊ߬ ߕߎ߬ߢߊ ߟߊ߫ ߸ ߞߏ߫ ߌ ߕߘߍ߬ ߌ ߖߍ߲߬ߞߍ߬ ߟߊ߫ ߡߍ߲ ߡߊ߬ ߸ ߏ߬ ߟߋ ߣߌ߲߬.
ߓߘߎ ߘߌߣߊ߬ ߝߍ߫ ߛߊ߫ ، ߒ߬ߓߊ߬ ߏ߬ ߟߋ ߞߐ߲߬ߞߐ߲߬ߒߡߊ ߟߏ߲ ߘߌ߫.
ߣߌߡߊ ߓߍ߯ ߘߌ߫ ߣߊ߬ ߸ ߞߐߜߍ߲ߓߊ߯ ߣߌ߫ ߛߙߋ߫ ߦߴߊ߬ ߞߋ߬ߟߋ߲߬ߞߋ߬ߟߋ߲߬ߣߊ ߝߍ߬.
ߞߏ߫ ߖߊ߯ߕߋ߬ ߸ ߌ ߖߊ߲߬ߓߐߣߍ߲߫ ߠߋ߫ ߕߘߍ߬ ( ߟߏ߲ ) ߢߌ߲߬ ߘߐ߫ ، ߞߏ߬ߣߵߊ߲ ߓߘߴߌ ߞߎ߲߬ߠߊ߬ߓߘߌ߬ߟߊ߲ ߓߐ߫ ߌ ߞߎ߲߬ߠߊ߫ ߸ ߌ ߦߋߟߌ߫ ߢߊ ߘߌߡߊ߲ߓߊ ߟߋ߫ ߓߌ߬.
ߊ߬ ߞߙߎߝߊߢߐ߲߮ ߘߴߊ߬ ߝߐ߫ ߸ ߞߏ߫ ( ߊ߬ ߗߋߥߊߟߌ ) ߡߍ߲ ߜߍ ߘߐ߫ ߒߠߋ ߓߘߊ ߸ ߏ߬ ߟߋ ߣߌ߲߬.
ߊ߬ ߘߌ߫ ߝߐ߫ ߞߏ߫ ߊߟߎ߫ ߝߌ߬ߟߊ ߦߋ߫ ߓߊ߲߬ߓߊ߰ ߓߟߋߓߟߋ߫ ߞߊ߲ߘߐߜߍߟߍ߲ ߘߊ߬ߡߊ ߟߊߝߟߌ߬ ߔߊߦߌߔߊߦߌ ߘߐ߫.
ߓߐߣߎߡߓߊߟߌ߫ ߖߊ߲߬ߘߊ߬ߓߊ߯ ߛߌߞߊߓߊ߮ ߘߊ߬ߡߊ ߞߊ߬ߣߌ߲߫.
ߡߍ߲ ߞߊ߬ ߡߊ߰ߙߌ߬ ߜߘߍ߫ ߞߍ߫ ߊߟߊ߫ ߝߍ߬ ߖߐ߫ ، ߊߟߎ߫ ߝߌ߬ߟߊ ߦߴߊ߬ ߓߎ߬ߓߎ߬ߡߊ߫ ߖߊ߲߰ߞߕߊ߬ ߜߍߟߍ߲ ߘߐ߫.
ߊ߬ ߞߙߎߝߊߢߐ߲߮ ߘߴߊ߬ ߝߐ߫ ߞߏ߫ ߊ߲ ߡߊ߰ߙߌ ߸ ߒߠߋ ߡߴߊ߬ ߟߐ߬ ߘߊ߲߬ߠߊ߬ߕߊߡߌ߲߫ ߠߊ߫ ߘߋ߬ ߸ ߞߏ߬ߣߵߊ߬ ߖߍ߬ߘߍ ߟߋ߫ ߕߍ߬ߘߍ߫ ߝߟߌ߬ ߔߘߋߞߟߋ ߘߐ߫.
‹ ߊߟߊ߫ › ߘߴߊ߬ ߝߐ߫ ߞߏ߫ ߊߟߎ߫ ߞߊߣߊ߬ ߘߊߘߛߐߛߐ߫ ߞߍ߫ ߒߠߋ ߓߘߊ ߘߋ߬ ߸ ߓߊߏ߬ ߒ ߞߊ߬ ߞߊ߲߬ߞߊ߬ߘߌ߬ߡߊ߬ߟߊ ߟߊߞߐ߲߰ ߊߟߎ߫ ߡߊ߬ ߟߋ߬ ( ߞߊ߬ߞߘߐ߬ ).
ߞߎߡߊ߫ ߕߍ߫ ߝߊ߬ߟߋ߲߬ ߠߊ߫ ߒߠߋ ߓߘߊ ߸ ߒ ߘߏ߲߬ ߕߍ߫ ߖߐ߲߭ ߠߎ߫ ߕߐ߬ߢߍ߰ߓߊ߯ ߘߌ߫.
ߊ߲ ߞߍߕߐ߫ ߊ߬ ߝߐ߫ ߟߊ߫ ߔߊߦߌߔߊߦߌ ߦߋ߫ ߟߏ߲ ߡߍ߲ ߒ ߞߏ߫ ߌ ߓߘߊ߫ ߝߊ߫؟ ، ߊ߬ ߘߴߊ߬ ߝߐ߫ ߞߏ߫ ߦߊ߯ߟߊ߫ ߡߞߊ߬ߝߏ߬ ߘߌ߫ ߛߐ߬ߘߐ߲߫ ߓߊ߬؟.
( ߡߍ߲ߘߌߦߊ ) ߣߊߞߐ ߘߌ߫ ߡߊߛߎ߬ߘߎ߲߬ߧߊ߫ ߝߊ߲ߕߊ߲ߞߟߊ ߟߎ߬ ߟߊ߫ ߣߌ߫ ߦߙߐߡߊߖߊ߲ߧߊ߫ ߕߍ߫.
ߝߋ߲߫ ߠߋ߫ ߣߌ߲߬ ߸ ߊߟߎ߫ ߦߟߌߡߊߘߌߦߊ ߦߴߌߘߐ߫ ߡߍ߲ ߠߊ߫ ، ߣߊߟߌ߬ߡߎ߲߫ ߖߘߍ߬ߟߛߊ߬ߦߌ߬ߟߊ߫ ߟߊ߬ߕߊ߲߬ߞߊ߬ߟߌ߬ߟߊ ߘߊ߬ߡߊ ߘߌ߫.
( ߏ߬ ) ߡߍ߲ ߛߌߟߊ߲߫ ߘߊ߫ ߡߊ߬ߤߌ߬ߣߊ߬ߟߊ ߢߍ߫ ߊ߬ ߢߊߞߕߐߡߊ߫ ߸ ߞߊ߬ ߣߊ߬ ߛߣߐ߬ߡߍ߫ ߖߘߍ߬ߟߛߊ߬ߦߌ߬ߟߊ ߘߌ߫.
ߊߟߎ߫ ߦߋ߫ ߘߏ߲߬ ߦߋ߲߬ ߖߐ ߘߌ߫ ߝߛߊߦߌ߫ ، ߒ߬ߓߊ߬ ߏ߬ ߟߋ ߘߎߡߊ ߟߏ߲ ߘߌ߫.
ߊ߬ߟߎ߫ ߛߊ߬ߥߏ ߟߴߊ߬ߟߎ߬ ߢߍ߫ ߦߋ߲߬ ، ߡߞߊ߬ߝߏ߬ߟߌ ߟߋ߫ ߘߏ߲߬ ߒ߬ߠߎ߬ ߓߘߊ ( ߞߘߊߎ߫ ).
ߊ߲ ߓߘߊ߫ ߓߐ߲ߛߐ߲ߘߊ߫ ߖߋ߬ߟߌߖߋ߬ߟߌ߫ ߟߋ߬ ߛߌߟߊߛߵߊ߬ߟߎ߬ ߢߍ߫ ߞߘߐ߬ߡߊ߲߫؟ ߏ߬ ߟߎ߬ ߦߋ߫ ߜߍ߬ߟߍ߲߬ ߊ߬ߟߎ߬ ߘߌ߫ ߡߌ߬ߘߊ߬ߟߌ ߘߐ߫ ߔߊߣߊ߲ߎ߲߫ ، ߏ߬ ߟߎ߫ ߣߊ߬ߘߊ߫ ߝߊ߲߬ߞߣߐ ߟߎ߬ ߘߐߥߟߏߡߊ߫ ߣߌ߫ ߓߏ߬ߙߌ߬ ߦߌߟߊ߫ ߓߍ߫.
ߖߊ߯ߕߋ߬ ߸ ߕߊ߰ߛߌ߬ߟߌ߫ ߟߴߏ߬ ߘߐ߫ ߛߣߐ߬ߡߍ߬ ߕߌ߮ ߦߋ߫ ، ߥߟߴߊ߬ ߞߊ߬ ߕߟߏߘߋ߲߫ ߓߍ߲߬ߢߐ߲߰ߦߊ߫ ߸ ߞߊ߬ ߞߍ߫ ߛߙߋ߫ ( ߢߣߊߓߊ߮ ) ߘߌ߫.
ߖߊ߯ߕߋ߬ ߸ ߒ߬ߠߎ߫ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߸ ߊ߬ ߣߌ߫ ߡߍ߲ ߦߴߊ߬ߟߎ߫ ߝߌ߬ߟߊ ߕߍ߫ ߕߟߋ߬ ߥߐ߯ߙߐ߫ ߟߋ߬ ߞߘߐ߫ ، ߛߍ߰ ߛߌ߫ ߘߏ߲߬ ߡߊ߫ ߡߊ߰ ߒ߬ߠߎ߬ ߟߊ߫.
ߒ߬ߓߊ߬ ߌߟߋ ߌ ߡߎ߬ߢߎ߲߫ ߊ߬ߟߎ߬ ߕߊ߫ ߝߐߕߊ ߟߎ߫ ߞߊ߲߬ ߖߐ߫ ، ߊ߬ ߣߴߌ ߦߋ߫ ߛߊߣߌ߲ߧߊ ߝߐ߫ ߞߵߊ߬ ߟߴߌ ߡߊ߰ߙߌ ߕߊ߲߬ߘߏ ߞߊ߲߬ ߸ ߕߋ߬ߟߋ ߖߌ߲ߞߌ߲ ߢߍ߫ ߸ ߊ߬ ߣߴߊ߬ ߓߋ߭ ߢߍ߫.
ߊ߬ ߣߴߌ ߦߴߊ߬ ߛߊߣߌ߲ߧߊ ߝߐ߫ ߛߎ ( ߝߣߊ߫ ) ߘߐ߫ ߸ ߊ߬ ߣߌ߫ ( ߛߊߟߌ ) ߕߌ߲ߓߌߘߌ߲߫ ߞߐ ߟߎ߬ ߘߐ߫.
ߌ ߦߋ߫ ߞߍ߫ ߕߟߏߡߊߟߐ ߘߐ߫ ߖߐ߫ ، ߟߏ߲ ߘߏ߫ ߸ ߞߟߌߟߌߟߊ ߘߌ߫ ߣߊ߬ ߞߟߌߟߌ ߞߍ߫ ߸ ߞߊ߬ ߓߐ߫ ߦߌߟߊ߫ ߛߎߘߎ߲ ߘߏ߫ ߘߐ߫.
ߏ߬ ߟߏ߲ ߠߋ߬ ߸ ߊ߬ߟߎ߬ ߘߌ߫ ߛߊ߬ߝߍ߬ ߞߊ߲ ߡߍ߲߫ ߕߎ߬ߢߊ ߟߊ߫ ، ߒ߬ߓߊ߬ ߸ ߏ߬ ߟߋ ߓߐߟߌ ߟߏ߲ ߘߌ߫ ( ߛߊ߬ߙߌ ߟߎ߬ ߘߐ߫ ).
ߊ߲ߠߎ߫ ߘߏ߲߬ ߸ ߒ߬ߠߎ߫ ߟߋ߫ ߟߊ߬ߣߌ߬ߡߦߊ߬ߟߌ ߞߍ߫ ߟߊ߫ ߸ ߒ߬ߠߎ߫ ߟߋ߫ ߟߊ߬ߣߌ߬ߒ߬ߕߊ߲߬ߧߊ߬ߟߌ ߞߍ߫ ߟߊ߫ ، ߟߊ߬ߓߊ߲ ߘߏ߲߬ ߞߍߕߐ߫ ߒ߬ߠߎ߫ ߟߋ߫ ߡߊ߬.
ߘߎ߱ ߛߍ߲ߞߍߕߐ߫ ߊ߬ߟߎ߫ ߡߊ߬ ߞߊߟߌߦߊ߫ ߘߐ߫ ߟߏ߲ ߡߍ߲ ߥߙߊߕߊߕߊ߫ ، ߏ ߟߊ߬ߘߍ ߣߐ߲߰ߡߊ߲߬ߓߊ ߟߋ߫ ߒ߬ߠߎ߫ ߡߊ߬.
ߒ߬ߠߎ߫ ߞߵߊ߬ ߟߐ߲߫ ߖߐ߫ ߊ߬ߟߎ߬ ߦߋ߫ ߞߎߡߊ߫ ߟߊ߫ ߡߍ߲ ߠߊ߫ ، ߒ߬ߞߊ߬ ߌߟߋ ߟߋ߬ ߕߍ߫ ߖߘߍ߬ߛߊ߰ߣߦߊ߬ߟߊ߫ ߘߴߊ߬ߟߎ߬ ߞߊ߲ߡߊ߬ ، ߒ߬ߓߊ߬ ߌ ߦߋ߫ ߡߐ߰ ߟߋ߬ ߖߊ߲߬ߓߌ߬ߟߊ߬ ߟߊ߫ ߞߎ߬ߙߊ߬ߣߊ ߟߊ߫ ߸ ߡߍ߲ ߦߋ߫ ߛߌߟߊ߲߫ ߠߊ߫ ߒ߬ ߠߊ߫ ߞߐ߲߬ߞߐ߲߬ߒߡߊ ߢߍ߫.